300

پی ڈی ایم دا لہور وچ وڈا جلسہ کرکے اسلام آباد وچ دھرنا دیون دا امکان

اسلام آباد ( محمد اکرم . رپورٹر سجن )
اپوزیشن جماعتاں دا اکٹھ -پاکستان ڈیموکریٹک موومنٹ 13 دسمبر نوں لہور دے مینار پاکستان دے وڈے میدان وچ وڈا تے زمین ہلا دین والا جلسہ کرن لئی ڈاڈھی تیاری وچ اے. اپوزیشن جماعتاں خاص کر مسلم لیگ ن اپنی اگوائی تے اپنے گڑھ وچ ہوون والے اس جلسے توں بھوہ امیداں لائی بیٹھی اے. تا نجے اس دی کامیابی توں بعد اوہ تحریک انصاف دی سرکارنوں دابے وچ رکھ کے اسلام آباد ول لانگ مارچ دا پڑہ پکھا سکے جتھے اوہ دھرنے دی اٹکل ورتدیاں اسمبلیاں توں اکٹھے استعفے دے کے ملک وچ مڑ توں چوناں دی منگ منوا سکے. پی ڈی ایم دے سارے وڈے آگو 8 دسمبر نوں اسلام آباد وچ بیٹھک کرن گے جہدے وچ 13 دسمبر دے جلسے مگروں لانگ مارچ شروع کرن دا دیہاڑ تے طریقا متھن آتے سانجھیاں صلاحوان کرن گے تے قومی اسمبلی دیاں 100 توں ودہ پی ڈی ایم وچ رلن والیاں جماعتاں دے ایم این ایز نوں اکھٹے استعفے دیون اتے راضی کرن بارے وی گل بات کرن گے. پی ڈی ایم وچ تن وڈیاں جماعتاں وچوں پیپلز پارٹی اجے تائیں استعفے دیون آتے راضی نئیں پر مسلم لیگ ن تے تیجی وڈی سیاسی مزہبی جماعت جمعیت علمائے اسلام استعفے دیون بارے سب توں زیادہ تاولیاں اے. جے یو آئی دے آگو فضل الرحمن الیکشن 2018 دیاں چوناں دے نتیجیاں نوں مانن نوں انکاری سن پر مسلم لیگ ن تے پیپلز پارٹی نے ایھناں نوں اسمبلی نوں چلن آتے راضی کیتا سی. فضل الرحمن نے پچھلے سال نومبر وچ ای مسلم لیگ ن تے پیپلز پارٹی دے آدھے دل نال کیتی حمایت دے وسو وی عمران خان دی حکومت خلاف سندھ توں لانگ مارچ شروع کرکے پنجاب توں ہوندیا ہویا اسلام آباد وچ وڈا اکٹھ تے دھرنا دتا سی پر اپنیاں منگاں منوائیو بنا دھرنا مکا دتا. اپوزیشن جماعتاں دے اکٹھ دا وڈا مطالبہ نوے الیکشن دا اے پر ایدھے نال نال اوہ سارے طاقتور آں جہدے وچ فوج قیادت تے عالی عدالتاں تے آگواں نال گل بات کرن دی گل کر رے نیں اور اس گل بات نوں شروع کران لئی میڈیا نوں آگے آن دی گل کر رے نیں. دوجے پاسے وزیر اعظم عمران خان دا کیہنا اے کہ لہور جلسے دی سرکاری طور آتے اجازت نئی دتی جاوے گی تے نہ ای پی ڈیم ایم دے جلسے آگے بنھ بنھیا جاوے گا. وزیر اعظم دا آکھنا اے کہ اپوزیشن دے جلسے جلوساں تے سارا رولا رپا این آر او لئی اے یعنی کرپشن بارے نیب دے کیس ختم کران لئی اے نا کہ ملک وچ نظر آون آلے مسئلیاں آتے. جے اپوزیشن جماعتاں اسلام آباد ول مارچ کرن دا فیصلہ کیتا تے ایہ پچھلے ست ورھیاں وچ اسلام آباد وچ کیتا گیا چوتھا لانگ مارچ تے دھرنا ہووے گے. 2013 وچ منہاج القرآن دے آگو طاہرالقادری نے پیپلز پارٹی دی حکومت خلاف، 2014 وچ عمران خان تے طاہر القادری نے نواز شریف دی حکومت تے 2019 وچ فضل الرحمن نے عمران خان دی حکومت خلاف مارچ کیتے، دھرنے وی دتے پر حکومت نوں ڈھان وچ کامیاب نہ ہوئے. ویکھنا اے وے کہ ہن کی نواں ہو وے گا.

اپنی رائے دا اظہار کرو