263

توہینِ مذہب قانون دی غلط وَرتوں روکی جائے، امریکی رپورٹ

امریکہ نے مذہبی آزادی بارے عالمی رپورٹ چ پاکستان اندر توہین مذہب دے الزام چ قید آسیہ بی بی دی رہائی دے فیصلے دی سلاہنا کر دیاں آکھیا اے کہ پاکستان چ اقلیتاں خلاف توہین مذہب قانون دی غلط ورتوں روکی جائے۔ پاکستان چ انسانی حقوق دِیاں تنظیماں وی ایس قانون چ ترمیم دی منگ کر دیاں ریہندیاں ہین۔ امریکی محکمہ خارجہ نے سال 2018ء بارے بین الاقوامی مذہبی آزادی دی رپورٹ جاری کیتی اے جیہدے چ پاکستان اُتے بھار پایا گیا اے کہ او ملک اندر اقلیتاں دی راکھی اَتے اوہناں دی مذہبی آزادی یقینی بناؤں لئی پَیر پَٹے۔
رپورٹ چ پاکستان دے توہین مذہبب قانون دا ذکر کر دیاں آکھیا گیا اے کہ پاکستان اندر توہین مذہب دے جرم چ گھٹو گھٹ 77 بندے جیلاں چ قید نیں جنہاں وچوں 28 نوں موت دی سزا دِتی گئی اے۔ غیر سرکاری آنکڑیاں موجب اِک ورھے دوران پاکستان اندر توہینِ مذہب دے الزام چ 7 ہور مقدمے درج ہوئے نیں۔ رپورٹ چ اکتوبر 2018ء چ توہین مذہب دے الزام اُتے قید آسیہ بی بی نوں سپریم کورٹ ولوں بری کیتے جان دے فیصلے نوں سلاہن جوگ آکھیدیاں دِسیا گیا اے کہ پاکستان دے عدالتی نظام چ تھلڑِیاں عدالتاں توہین مذہب دے مقدمیاں چ انصاف دِیاں لوڑاں نئیں پُور دِیاں۔ رپورٹ چ ہور کہیا گیا اے کہ پاکستان چ مذہباں وچکار اِک سُرتا دی لوڑ اے تے عالمی مذہبی آزادی دے ایکٹ 1998ء تحت پاکستان چ مذہبی آزادی دی خلاف ورزی کرن تے امریکہ پاکستان اُتے پابندیاں وی لا سکدا ہے۔

اپنی رائے دا اظہار کرو