292

مسلم لیگ ن دے نویں عہدیداراں دا اعلان

لہور (سجن رپورٹ) مسلم لیگ ن دی تنظیمِ نو کر کے نویں عہدیداراں دا اعلان کر دِتا گیا۔ اہم تبدیلی مریم نواز شریف نوں پہلی واری پارٹی عہدہ ملنا اے، اوہناں نوں کئی ہور نائب صدراں نال پارٹی دا نائب صدر بنایا گیا اے۔ تنظیم نو دا فیصلہ اسلام آباد وچ پارٹی دی سینئیر قیادت دے اجلاس وچ کیتا گیا۔ پارٹی ذرائع موجب نویں تنظیم سازی پارٹی قائد میاں نواز شریف دی صلاح نال کیتی گئی اے تے ایہدا مقصد پارٹی نوں درپیش چیلنجاں دا چنگے ڈھنگ نال مقابلہ کرنا اے۔
لندن وچ موجود پارٹی صدر تے اپوزیشن لیڈر شہباز شریف ولوں جاری کیتے اعلامیے موجب سابق وزیراعظم شاہد خاقان عباسی سینئر نائب صدر دی حیثیت نال کم کرن گے جد کہ احسن اقبال سیکرٹری جنرل ہوون گے۔ مریم اورنگزیب نوں سیکرٹری اطلاعات بناون دے نال اوہناں نوں پارٹی ترجمان برقرار رکھیا گیا اے، لندن وچ مقیم اسحاق ڈار نوں پارٹی وچ نواں عہدہ اُسار کے انٹرنیشنل افئیرز دا صدر بنا دتا گیا اے۔ نویں نائب صدراں وچ مریم نواز شریف دے علاوہ پرویز رشید، مشاہد اللہ خان، خرم دستگیر، برجیس طاہر، ایاز صادق، میاں جاوید لطیف، محمد زبیر، نیلسن عظیم، رانا تنویر حسین، سردار مہتاب احمد خان، راحیلہ درانی، خواجہ سعد رفیق، عابد شیر علی، ڈاکٹر درشن لال تے حمزہ شہباز شامل نیں۔ نور الحسن تنویر نوں جنرل سیکرٹری انٹرنیشنل افیرز، بلیغ الرحمان تے عطا اللہ تارڑ نوں ڈپٹی سیکرٹری جنرل، بلال اظہر کیانی، فرحان ظفر جھگڑا تے سارہ تھیبو نوں اسسٹنٹ سیکرٹری جنرل جد کہ طلال چوہدری تے عباس آفریدی نوں جوائنٹ سیکرٹری بنا دتا گیا اے۔
پرویز ملک نوں سیکرٹری فنانس، طارق فاطمی نوں سیکرٹری پالیسی اینڈ ریسرچ، شاذ فاطمہ نوں سیکرٹری پارلیمانی افئیرز، عائشہ رضا فاروق سیکرٹری ممبر شپ اینڈ ٹریننگ، رومینہ خورشید عالم سیکرٹری ہیومن ریسورس اینڈ سول سوسائٹی، چوہدری ریاض الحق صدر کسان ونگ، کامران مائیکل صدر میناریٹیز ونگ، میاں منان صدر ٹریڈرز ونگ، ڈاکٹر مصدق ملک صدر پروفیشنلز ونگ، نزہت عامر صادق صدر ویمن ونگ، رمیش سنگھ اروہ سیکرٹری جنرل مینارٹیز ونگ تے قیصر احمد شیخ صدر بزنس اینڈ کامرس ونگ دی حیثیت نال کم کرن گے۔

اپنی رائے دا اظہار کرو