لہور (سجن رپورٹ) لہور ریلوے سیشن تے راولپنڈی توں کراچی جاون والی ٹرین تیزگام 6 گھنٹے کھلوتی رہی تے شام ساڈھے چھ وجے ریلوے سٹیشن دی انتظامیہ نے ٹرین وچ مسافراں نوں بجلی دی سپلائی وی بند کر دتی۔ تیزگام ایکسپریس اج شیڈول دے مطابق دوپہر اک وج کے چار منٹ تے لہور ریلوے سِیشن تے پہنچی سی تے شیڈول دے مطابق لہور توں کجھ نویں ڈبے لگن دے بعد ایہنے اک وج کے 55 منٹ تے کراچی لئی ٹرنا سی۔ جدوں ڈھائی وحے تائیں رین نہ چلی تے انتظامیہ نے دیر ہوون دی کوئی وجہ وی نہ دسی تے کجھ مسافراں نے سوشل ویب سائٹاں تے احتجاجی پوسٹاں کرنیاں شروع کر دتیاں۔ اک نیوز چینل نے تیزگام دی کراچی روانگی وچ دیر ہوون باے پچھیا تے سٹیشن دی انتظامیہ نے دسیا کہ ٹرین شام 5 وج کے 20 منٹ تے ٹر پئے گی۔ ایس یقین دہانی نوں نیوز چینل نے شام 4 وج کے 30 منٹ تے نشر وی کر دتا لیکن ٹرین سوا پنج وجے وی نہ ٹری سگوں رات پونے ست وجے انتظامیہ نے ٹرین دی بجلی ہی بند کر دتی۔
ریلوے سیشن دے کجھ ملازماں دسیا کہ اج کراچی جاون والیشالیمار ایکسپریس دی لہور توں ٹکٹاں ضرورت تے گنجائش توں زیادہ ویچ دتیاں گئیاں نیں۔ سواریاں زیادہ نیں تے کہور سٹیشن تےٹرین نال جوڑن واسطے ڈبے تھوڑے نیں۔ ہن سٹیشن اتنظامیہ کراچی توں آون والی اک ٹرین نوں اڈیکدی پئی اے، اوہ ٹرین آوے گی تے اوہدے ڈبے لاہ کے شالیمار ایکسپریس نال جوڑے جاون گے، تاں ٹرین چلے گی۔ بعض ملازماں دسیا کہ ریلوے دے انتظامی معاملے وگڑے ہوئے نیں، چھوٹے چھوٹے مسئلے وی مقامی افسر آپ حل نہیں کردے سگوں وڈے افسراں نوں دس کے چپ کر کے بیٹھ جاندے نیں۔ٹریناں دا شیڈول متاثر ہوون نال کراچی ایکسپریس تے کئی دوجیاں ٹریناں وی دسے گئے وقت توں کافی دیر نال ٹوریاں گئیاں۔ ساڈھے ست وجے آخری اطلاعواں آون تائیں تیزگام لہور سٹیشن تے بجلی دے بغیر کھلوتی ہوئی سی تے ٹرین وچ بیٹھے مسافر گرمی تے حبس دے ہتھوں پریشان سن۔
![](https://sajjanlahore.com/wp-content/uploads/2019/04/railways.jpg)