330

سپریم کورٹ کشمیر وچ میڈیا اتے پابندیاں، مودی سرکار توں جواب منگ لیا

نویں دلی ،رپورٹ دی ہندو۔
سپریم کورٹ کشمیر دی خاص حیثیت ختم کرن لئی آرٹیکل 370 بارے بھارتی سرکار دے فیصلے خلاف درخواست اتے معاملے نوں آئینی طور اتے پرکھن دا فیصلہ کیتا اے، چیف جسٹس رانجن گگوئی نے 5 ممبری بنچ بنادتا اے، جیہڑا ایس معاملے دی شنوائی کرے گا۔
بھارتی سپریم کورٹ نے مقبوضہ کشمیر وچ میڈیا اتے پابندیاں متعلق مودی سرکار توں جواب منگ لیا۔

عدالت وچ بھارت سرکار ولوں مقبوضہ کشمیر وچ میڈیا اتے ہٹکاں بارے کیس دی شنوائی وی کیتی۔
درخواست گزار ارونادا بھاسن آکھیا کہ مقبوضہ کشمیر وچ لاک ڈاؤن نوں 24 روز ہو گئے نیں تے وادی وچ صحافیاں اتے پابندیاں لگیا نیں۔
سپریم کورٹ نے مرکزی تے جموں کشمیر سرکار نوں صدارتی حکم خلاف نوٹس جاری کیتے تے نال ای اوہناں توں جواب وی منگے نیں۔ سبھ توں وڈی عدالت کیمونسٹ پارٹی آف انڈیا دے جنرل سیکرٹری سیتا رام یشوری نوں جموں کشمیر دا دورہ کرن تے اوتھے گرفتار اپنے پارٹی ساتھی ایم ڈی یوسف نال ملاقات کرن دی اجازت وی دے دتی۔
عدالت نے سرکار دی ایس دلیل نوں منن توں انکار کردتا کہ سرکار نوں نوٹس جاری کرن دے سرحد پار معاملات وگڑن دا خدشہ ہوسکدا اے۔
اٹارنی جنرل آکھیا کہ ایس عدالت جو کجھ وی کہیا اے اوہ سبھ اقوام متحدہ نوں پہلاں ای گھل دتا گیا اے۔
سپریم کورٹ جواب وچ آکھیا کہ اسیں جاندے آں کیہ کرنا اے، عدالت حکم جاری کردتا اے ایس نوں ہن بدلیا نئیں جاسکدا۔
نیشنل کانفرنس دے رکن پارلیمنٹ محمد اکبر لون، ایڈووکیٹ ایم آئی شرما تے ریٹائرڈ جسٹس حسنین مسعودی نے آئین وچ ترمیم نوں سپریم کورٹ وچ چیلنج کیتا اے۔

اپنی رائے دا اظہار کرو