318

بیت المقدس برائے فروخت نہیں، فلسطین نے ٹرمپ دا امن منصوبہ رد دتا

امریکی صدر ڈونلڈ ٹرمپ نے فلسطین دی مخالفت باوجود اسرائیلی وزیراعظم نیتن یاہو نال رل کے پریس کانفرنس کردیاں فلسطین اسرائیل امن منصوبے دا اعلان کیتا جیہدے خلاف فلسطینی تنظیماں فلسطینی لبریشن آرگنائزیشن، حماس تے اسلامی جہاد اکمٹھ ہو گئیاں نیں۔

امریکی صدر دے اعلان کیتے امن منصوبے وچ مقبوضہ بیت المقدس نوں اسرائیل دا ناں ونڈے جاون والا دارالحکومت رکھنا دا آکھیا گیا۔جدکہ فلسطین نوں مقبوضہ مشرقی یروشلم دے اندر دارالحکومت بناون دی اجازت ہووے گی۔ منصوبے تحت اسرائیل دی غیر قنونی بستیاں نوں قنونی بنایا جاوے گا۔
امریکی صدر دے اعلان مگروں رملہ (رام اللہ) وچ فلسطینی صدر محمود عباس نے وکھالا کرن والیاں نال تقریر کردیاں کہیا کہ جے قبضے والا بیت المقدس فلسطینی ریاست دا دارالحکومت نئیں تاں اسیں اوس نوں کیویں قبول کراں گے؟
فلسطینی صدر آکھیا کہ ٹرمپ تے نیتن یاہو نوں دسنا چاہندا آں پئی بیت المقدس برائے فروخت نئیں، فلسطینیاں دے حق برائے فروخت نئیں۔
امریکی صدر دے منصوبے نوں رد کرن دی منگ کیتی تے آکھیا فلسطینیاں دے حقاں اتے کوئی سودے بازی نئیں ہووے گی، ایہہ ڈیل سازش اے جیہڑے توڑ نئیں چڑے گی۔
حماس وی ایس منصوبے دی مخالفت کردیاں ایس نوں مسترد کردتا، عرب لیگ نے صورتحال دا جائزہ لین لئی اپنا اجلاس بلالیا اے۔
ترکی دا آکھنا اے پئی ایہہ نام نہاد منصوبہ اسرائیلی بستیاں وسان خاطر لیاندا گیا اے۔ جس نوں کوئی وی قبول نئیں کرے گا۔
سعودی عرب آکھیا پئی اسرائیل بارے اوس دی پالیسی وچ کوئی فرق نئیں آوے گا۔
ایران نے منصوبے دی مذمت کردیاں ایس نوں نوں صدی دی وڈی غداری آکھیا اے۔

اپنی رائے دا اظہار کرو