418

اسامہ خلاف آپریشن وچ امریکا دھوکھا دتا

پاک فوج دے ترجمان میجر جنرل آصف غفور نے انکشاف کیتا اے کہ پاکستان نے ایبٹ آباد وچ القاعدہ بانی اُسامہ بن لادن دی موجودگی متعلق امریکا نوں جانکاری دتی لیکن واشنگٹن نے سانجھے آپریشن دی تھاں آپ ای اسامہ بن لادن خلاف آپریشن کرکے سانوں دھوکا دتا۔

اسلام آباد وچ پاک فوج دے شعبہ تعلقات عامہ آئی ایس پی آر دے ڈائریکٹر جنرل میجر جنرل آصف غفور نے مقبوضہ کشمیر بارے تفصیلی پریس کانفرنس ختم کرن مگروں غیر رسمی گل بات دوران صحافیاں نوں دسیا کہ اسامہ بن لادن دا پتا لاون بارے پہلی فون کال پاکستان نے ٹریس کیتی سی۔

ڈان نیوز مطابق اک سوال دے جواب وچ ترجمان فوج نے دسیا کہ ٹیلی فون کال ٹریس کرکے امریکا نال تفصیلی انٹیلی جنس شیئرنگ کیتی گئی سی۔
اوہناں الزام لایا کہ امریکا نے 2011 وچ ایبٹ آباد دے سانجھے آپریشن دی تھاں آپ ای اسامہ بن لادن خلاف آپریشن کرلیا سی۔
میجر جنرل آصف غفور نے آکھیا کہ ’امریکا نے انٹیلی جنس شیئرنگ مگروں پاکستان نال دھوکا بازی کیتی۔
امریکی صدر ٹرمپ نال وزیراعظم تے آرمی چیف دی گل بات دا حوالہ دیندے اوہناں آکھیا کشمیر اتے کسے قسم دی سودے بازی نئیں ہوئی، میجر جنرل آصف غفور کیہاکہ کشمیر کسے اک پارٹی دا مسئلہ نئیں ساڈا ساریاں دا ایس دی خاطر سانوں ساریاں نوں رل کے آواز چکنی پئے گی۔
اوہناں وضاحت کیتی کہ ٹرمپ عمران خان گل بات سبھ دے سامنے ہوئی ایہدے وچ کوئی اوہلا نئیں، کشمیر پاکستان دی شہ رگ اے اوس دی خاطر اخیرلی گولی، اخیرلے سپاہی تے اخیرلے ساہ تیک لڑاں گے۔

اپنی رائے دا اظہار کرو