325

آسیہ بی بی ملکوں باہر ٹُر گئی

لہور (سجن رپورٹ) توہین رسالت دے الزام چ سزائے موت دے مقدمے وچوں سپریم کورٹ توں بری ہوون والی مسیحی زنانی آسیہ بی بی پاکستان توں باہر ٹُر گئی۔ دفتر خارجہ دے ترجمان نے آسیہ بی بی دے ملک چھڈ جاون دا پَک کردیاں دَسیا کہ اوہ آزاد شہری اے تے آپنی مرضی نال پاکستان توں باہر ٹُر گئی اے۔ آسیہ بی بی دے پاکستان چھڈ کے کینیڈا جاون دی خبر کل 7 مئی نوں اخبار ڈیلی میل دے رپورٹر سام گرین ہل نے دَسی سی۔ آسیہ نوں 2010ء وچ اک سیشن کورٹ نے توہین رسالت دے الزام وچ موت دی سزا سنائی سی، ہائی کورٹ نے وی اپیل وچ ایہہ سزا برقرار رکھی اَتے سپریم کورٹ نے اوہدی اپیل کئی ورھے تائیں نہ سنی۔ اکتوبر 2018 وچ سپریم کورٹ نے آسیہ بی بی نوں مقدمے وچوں بری کر کے رہا کرن دا حکم دِتا سی پَر کجھ مذہبی جماعتاں ولوں تشدد دے ڈر کارن حکومت نے اوہنوں رہا ہوون دے باوجود فوری ملکوں باہر جاون توں روک دتا سی تے کسے محفوظ تھاں تے رکھیا ہوئیا سی۔ بعض جنونیاں آسیہ بی بی نوں پناہ دین والے ملک دے پاکستان وچ سفارتخانہ تے حملے دی وی تڑھی لائی سی ایس دے باوجود کینیڈا نے اوہنوں ویزا دے دتا۔اوس دیاں دونویں دھیاں وی کینیڈا وچ نیں۔ 53 ورھیاں دی آسیہ بی بی لمے چر توں بیمار وی اے۔

اپنی رائے دا اظہار کرو

آسیہ بی بی ملکوں باہر ٹُر گئی” ایک تبصرہ

تبصرے بند ہیں