567

چترکاراکرم وڑائچ دی حیاتی بارے … لکھاری زاھد اقبال بٹ

اکرم وڑائچ دانشور،پیینٹر ، جرنلسٹ ،فوٹوگرافر ، تھیٹر آرٹیسٹک ڈائیریکٹر وزیرآبا د دے سیاسی گھرانےسمیاں وچ کوثے اتھرواں نال بھری اکھ کھولی تے ایہ ماں جایا لوکائی سیوک اپنے اندر دیاں کندھاں ڈھاندا جنگل بیلے آن کھلوتا جتھے اوھ اپنے سچ نال پھڑدا، کھیندا رھیا مڑ تائیوں پریت کھیڈ دی آزادی اپنے جسے نال کج دا رھیا ،ناڑیاں اندرمچ مچدا رھیا تے پریت والا دھواں دھکھدا رھیا، کھڑ کھڑ ھسدا رھیا ، لوکاں نوں چک چک لوریاں دیندا رھیا تے جگت وچ ھاسے ونڈ دا رھیا .جنگل بیلے دریا اوس دے ھانی نیں سچ پچھے تاں سر توں لے کے پیر تائیں پاء اکرم پانی پانی اے ‘ …اوہ ساری شھر دا ھانی اے ….اوہ ساری شھر دا ھانی اے .. اکرم وڑائچ ھوراں کیڈٹ کالج پٹارو تے پنجاب یونیورسٹی لاھور توں تعلیم لئی مڑ اوھناں “لویولٹا میری ماوئنٹ یونیورسٹی توں تھیٹر آرٹ پڑھیا، سکھیا تے رھس کیتا، پیپلز فرینڈشپ یونیورسٹی آف رشیا (روس) دے پڑاھکووی (طالب علم) رہ چکے نیں ۔ اکرم وڑائچ دا شمار پروگریسو ” اجوکا تھیٹر “دے بانیاں وچ آوندا اے ۔اس تھیٹر گروپ نے ضیاء ماشل لاء دے دور وچ لوکاں دی زبان بنن دا کم کیتا۔تے اوھدی بھاری قیمت چکانی پئی، اوھناں انگریزی اخبار فرنٹ ئیر پوسٹ وچ جرنلسٹ دی حثیت نال کم کیتا تے نال نال چترکاری (مصوری ) اپنی جڑ پھڑدی رھی تے اوھناں دا کم گھراں دی زینت بندا رھیا ُُاکرم وڑائچ ویر اپنی پہچان آپ ھے ۔۔۔پر تھاڈے لئی اعجاز سماں پی پی پی دے وڈے بھرا اے ۔۔۔ ساڈا مان تران ۔۔۔ اوہ ساڈی روحاں وچ وسدے نیں ۔۔۔ ُُُُاکرم وڑائچ ویر اس دور دا سب توں وڈا تے سچا پروگریسو کامریڈ ساڈا ویر اے ۔اوھدی کرنی ، ٹرنی ، تے ویکھنی پچھلے 38 سالاں توں میں ویکھ رھیاں اوہ کمال دے دانشور، اس پاکستان دا واحد کامریڈ جنھاں دے ھر قدم دی تریخ اے بھاویں بلوچستان دے لوکاں دا سیاسی مسلہ ھووے یاں پاکستان دی لال تحریک ھووے سب نوں لاڈ کرن وچ اگے ھوندے نیں.اوھناں وزیرآباد شھر دے ترقی پسند نوجواناں نہ صرف گود کھڈایا سگوں نویں نسل دیاں جھولیاں لاڈاں تے پریت کھیڈ نال نکو نک کر دتیاں ۔۔۔ پاء ُُاکرم وڑائچ ویر دے ساھمنے دنیا جھان دیاں نعمتاں سن پر اوھناں دھن دولت اتے مان کرن دی تھاں اک عام بندے وانگوں زندگی گزاری تے گزار رھے نیں کیونجے اوہ جاندے سن کہ دھن دولت زھانت بندے نوں تباہ کر چھڈدی اے تے سٹے وچ ماڑے لوکاں نال سانگاں اکا مکاء چھڈدی اے اس واسطے اوھناں سب کجھ پش پشت ڈال کے صحیح معنیاں وچ بنا وتکرے ساریاں نال سانگاں جوڑدا رھیا ، ماڑیاں دا رنگ اپنے انگ وچ کھلاردا رھیا تے اس دھمال وچ اپنی حیاتی دے رنگ چتر کاری راھیں دھرتی وچ کھلار دا رھیا ، پاء اکرم وڑائچ چاھندا تے اوہ سرکار وچ چنگے اچیرے منصب اتے کم کر سکدے سن کیونجے اوس وقت اوھدا بیلی تے جما تی (کلاس فیلو) صدر پاکستان آصف زرداری سی . اسانی نال کم کڈھیا جا سکدا سی پر حیاتی دی کاڈہ کڈھنا تے ماڑیاں نال پریت سنگیت کھیڈ اڈاری دے پر کٹے جاون دی حقیقت موجود سی ، اکرم وڑائچ جاندا سی کہ بندے لشک پشک تے چار ودہ پیسیاں دی خاطر چنگے بھلے بندے ھائی جیک ھو کے اپنی زھانت دا گتاوا کر چھڈ دے نیں فیر آخری عمرے بدوبدی ترقی پسنداں دی نمبر پلیٹ متھے ٹکاون دی جھد وچ ادھر اوودھدرکندھاں نوں ٹکرا مار دے پھردے نظری اوندے نیں پر اپنے اندرانساناں دی تقسیم دی ماریاں کندھاں نوں ڈھاون تے مکاون وچ اپنا متھا دھکانے زخمی کر بیٹھدے نیں ۔ اکرم ھوراں عوامی جدوجھد نال سانجھ بناون دا چارا کیتا تے شھر وزیراباد دے ترقی پسند نوجواناں دے دیویاں وچ تیل پاون دی تھاں اوھنے لوکائی اندر چانن کھلار دتا ،، تاں جے ایہ دیوے آپوں بلدے رھن ۔۔۔اکرم وڑایچ ھورا ں شادی خان ورگے لکڑی اتے کم کرن والے آرٹسٹ دی صلاحناں کیتی تے چک اسمانی کیتا تے ھرپدھر اتے شادی خان دے کم دی صلاحناں کیتی، ہمت ودھائی ،اج شادی خان دا کم برصغیروچ ویکھیا جا رھیا اے اکرم وڑائچ دا شمار پنجاب دا پھلا پنجابی اخبار سجن لاھور کڈھن والے بانیاں دی لڑی وچ ھوندا اے جنھاں وچ استاد محتر حسین نقی جی ، ظفر یاب احمد ، نجم حسین سید ، مقصود ثاقب جی ،ھما جی تے ویو پوائینٹ دے سوجھوان شامل نیں .. مینوں اوس ویلے دی اک اک کھڑی یاد اے جد ساڈے ساھمنے “سجن اخبار ” وچ پاء اکرم وڑائچ ھوراں ساری ساری رات مفت رج کم کیتا تے سجن دے سارے کامیا نوں اپنیاں من کھچویاں گلاں نال آرے لائی رکھیا ۔ …. اجوکے سمے اکرم وڑائچ رج چترکاری کر رھیا اے تے اوھناں دیاں پیٹنگز دیاں درجناں نمائیشا ں ھو چکیا نیں آخری گل ہمیشا اکرم وڑائچ پچھے رہیا تے سانوں اگے کر دا رھیا ایہ صفت دانشوراں وچ گھٹ ھوندی اے تے اوہ نوجواناں لئی اپنے دروازے مرن تک بند ھی رکھدے نیں تے اجیھے تقلیدی دانشور تعریف کرن لگیاں کنجوسی توں کم لیندے نیں ۔۔۔ پر ۔۔۔۔اکرم وڑائچ دے گھر دیاں نہ کندھاں نہ بوھے باریاں ۔۔۔۔۔۔۔۔ اے اکرم وڑائچ تینوں جھک کے لکھاں سلام

اپنی رائے دا اظہار کرو