528

پنجابیاں نوں وساکھی مبارک

لکھاری
ناہید مہدی

شمسی کیلنڈر موجب اج وساکھ دی پہلی تاریخ اے – پنجاب وچ وساکھ نویں سال دے نال نال نویں فصل چُکن دا ویلا ہوندا اے۔
پنجاب جیہڑا اپنی زرخیزی پاروں دنیا بھر وچ بریڈ باسکٹ یاں روٹی دی چنگیر دے ناں تو جانیا جاندا اے اوس دے واہکاں دی سبھ توں اہم فصل کنک ہوندی اے اوس دی واہڈی پہلی وساکھ توں شروع ہوندی اے۔
ایہہ مہینہ ہر کسے لئی خوشیاں دا مہینہ ہوندا اے۔ جتھے ہر واہی وان دی سال دی محنت رنگ لیاؤندی اے اوتھے اوس دی پورے ورھے دی آمدن دے نال نال دانیاں دا وی بندوبست ہوندا اے۔
واہی واناں دے نال نال دیہاڑی دار لوک وی واہڈی تے کنک چُکن وچ کم کر دے نیں۔ ایس طرح ساریاں لوکاں نوں سال بھر دے دانیاں دا بندوبست ہوندا اے۔
وساکھ وچ سنہرے رنگ دے کنک دے سٹے پیلیاں وچ ہوا دے بُلیاں نال بچ رہئے ہوندے نیں۔ اپنی کنک نوں ویکھ ویکھ کے کساناں دیاں دلاں وچ وی بھنگڑے پے رہئے ہوندے نیں۔ ہر پاسے میلہ ورگا سماں ہوندا اے۔
پچھلے والیاں وچ لوک رل کے کنکاں دی واہڈی کر دے سن۔ اک دوجے دا ہتھ ونڈاندے سن۔ بھائی چارے دا ماحول ہوندا سی۔
لنگڑے ویلیاں وچ پنڈاں دے لوک برادری وان فوم رہندے ہن۔ پنڈ دا کمہار سارے پنڈ لئی بھانڈے بناؤندا سی۔ فصل چُکی جاون تے اوس نوں وی حصہ لبھدا سی۔ ایسے طرحاں دوجے کماں والیاں جیویں لوہار ترکھان موچی نائی میراثی ماچھی تے پنڈ دے مولوی نوں دانے مل دے سن۔
واہڈی بڑے چاواں نال شروع کیتی جاندی سی۔ ڈھول وگدا سی تے جوان بڈھے رل کے جھومراں دے بھنگڑے پاؤندے سن۔
گھراں وچ زنانیاں مزے مزے دے کھانے پکاندیاں سن۔ حلوہ جس نوں کڑاہ وی آکھیا جاندا اے خاص طور تے پک دا سی۔ کُڑیاں گانے گاؤندیاں پیلیاں وچ کھانا لیاؤندیاں سن۔ واہڈی کرن دے مقابلے ہوندے زیادہ فصل چُکن والے دی واہوا ہوندی۔
ایہہ ہرکھ دی گل اے بئی مارشل لا دے دس سالاں وچ پاکستان دی قدیمی رہتل نوں بوہت نقصان ہوئیا تے ہن وساکھ دے میلے نہیں لگ دے جیہڑے پنجاب دی رہتل دا حصہ سن۔
پہلوں پورے پنڈے دیاں دھیاں بھیناں سانجھیاں ہوندیاں سن تے عزت وی سانجھی ہوندی سی تے کُڑیاں چِڑیاں بغیر کسے برقعے یاں پردے دے آوندیاں جاندیاں سن تے سبھ دیاں عزتاں محفوظ سن۔
ہن پاکستان وچ سعودی عرب تے دوجے پاسے ایران دی رہتل نے مل مار لئی اے۔
ایس مل والی رہتل جنہوں ناسور آکھیا جاوے تے چنگا ہووے گا ساڈی اپنی رہتل دی حیاتی کا ساہ گھوٹ دتا اے۔ ضیا الحق دے برانڈ دے اسلام نے ساڈیاں زنانیاں کولوں رنگ برنگے لیڑے کھوہ کے کالا برقعہ تے کالی چادر پوا دتی اے تے ایس طرح ساڈی زنانیاں نوں بھوت پریت بنا دتا گیا۔ عرباں دا لباس پوا کے پاکستانی زنانیاں کولوں اوہناں دا زنانہ حسن کھوہ لیا گیا اے۔
ہن وساکھ دا مہینہ میلے ٹھیلیاں دی تھاں سکھاں دی مذہبی رسماں تے رواجاں دا مہینہ بن کے رہ گیا۔ دنیا ہن وساکھ نوں سکھاں دے تہواراں دے حوالے نال جاندی اے جد کہ وساکھ میلے دی تاریخ سکھ مذہب توں کِتے زیادہ پُرانی اے۔
اج برطانیہ تے کینیڈا دے وزیر اعظم وساکھی دی ودھائی سکھاں نوں دے رہئے نیں۔ وساکھ پنجابیاں دا مہینہ سی، ہے تے رہوے گا۔

اپنی رائے دا اظہار کرو

2 تبصرے “پنجابیاں نوں وساکھی مبارک

  1. ziaulhaq brand islam throay chir pechoon nahin rahna yeh muk jaana. wasakh sadi ruhtal hae te mur manaya ja reha je.

تبصرے بند ہیں