منوں بھائی ( منیر احمد قریشی )
منوں بھائی وزیرآباد شیشیانوالے محلے دے جم پل سن ۔چھوٹیاں بھیناں منیر احمد قریشی ھوراں نوں چاء نال منوں بھائی بنا دتا ۔ ابے ھوریں امام مسجد تے دادے ھوریں کتاباں جلد کردے سن ۔ دادے ھوراں منوں بھائی نوں کتاباں پڑھن دے آرے لاء دتا۔ وزیراباد آنا جانا سی تے گوجرانوالہ دی سندس فاونڈیشن وچ کم کرن دی حامی بھر لئی تے گوجرانوالیا دے شیراں منوں بھائی نوں سر چک منٹاں وچ چیئر مین بنا دتا ۔۔ ساری حیاتی بالاں لئی خون اکٹھا کرن دے کم اتے لاء دتی ۔۔ منوں بھائی نوں میں کیہ آکھاں ۔۔ دانشور ،صحافی ،پنجابی شاعر ،ادیب، ڈرامہ رائیٹر ، سوشل ایکٹویسٹ، کالم نگار، آکھاں۔۔۔جے ٹی وی ول مکھ موڑئیے تاں منوں بھائی جھوک سیال ،آپے رانجھا ھوئی، آشیانہ ، خوبصورت، سونا چاندی لکھ کے ٹیلی ویثناں اگے رونقاں لاء دتیاں ، جے اخبار دے دفتر ول رخ کرئیے تے سن 1955 وچ ” تعمیر ” دے دفتر پروف ریڈنگ ، نیوز ریڈنگ ، سببنگ ،سب ایڈیٹری تے کالم نگاری کر دے نظر اوندے سن ۔ امروز وچ ان پانی کماون لئی ھتہ پیر ماردے رھے۔ 1957 وچ پھلا کالم لکھ ماریا۔ کمر سدھی ھو چکی سی تے 77۔1970 وچ مساوات دے چیف رپورٹر بن گئے ۔۔۔گریبان دے ناں اتے 40 سال مسلسل کالم لکھ دے رھے ۔ ماشل لاء دے سارے اوکھے دور ویکھے تے مزاحمت کر کے اپنی برداشت نوں گودہ کھڈاندے رھے جو حق سچ لبھیا گزارا کر دے رھے ۔۔ میں تے منوں بھائی ھوراں نال بدیسی ملک وچ 2004 وچ اک عالمی کانفرنس وچ اکٹھیا شرکت کیتی جتھے اوھناں نال ( منوں بھائی ) 5 دیھاڑے اکٹھیا گزارے تے راتیں اک عشائییے وچ اوھناں دیاں رج گلاں سنن دا موقع ملیا تے اج 17 سال بعد جد میں اوھناں بارے سوچنا تاں مینوں اوھناں دیاں گلاں وچ بھرپور شدت نال مزاحمت نظری آوندی اے ۔۔۔ منوں بھائی نے اپنی گل بات وچ آکھیا کہ اک دن فیض صاب نوں آکھیا کی اردو وچ گل بن نھیں رھی تے اوھناں جواب وچ آکھیا پنجابی وچ لکھیا کر ۔۔۔۔۔۔۔ اسلم اظہر آکھیا شیر خان ڈرامہ لکھ۔۔۔ منوں بھائی چھکدیاں چھلدیاں ڈرامہ شام تک لکھ دتا تے اپنی قابلیت اک ھور بٹن دبا دتا۔۔منوں بھائی سندس فاونڈیشن دی لاج رکھدے رھے ، محنت کر دے رھے ،جھولی اگے کر کے چندہ منگدے رھے ، 8 شھراں وچ برانچاں بالاں دے بلڈ کینسر تے تھلیسیمیاں دے بال مریضاں دیاں سیوا کر دے رھے ، بالاں دیاں زندگیاں وچ رنگ بھردے رھے تے کہکشاں وانگوں اوھناں دے رنگ آسمانی ھو گئے ھن سارا جگ ایس اسمانی پینگ نوں چانواں نال چھوٹ دا رھندا اے ۔۔۔ منوں بھائی انسانیت لئی ساری عمر کم کرن دے صلے وچ میں تھانوں جھک کے کروڑ واری سلام پیش کرنا ۔۔۔۔۔ زاھد اقبال بٹ
49
![](https://sajjanlahore.com/wp-content/uploads/2021/10/mmmmmmmmmmmmmmmmmmm-501x320.jpg)