542

ودھدی کالک تے باؤ جی

لکھاری
اکرم ہدایت اللہ

اوہدا ناں تے یاد نہیں پر اوہدا گول مول تےددھ ورگے چٹے رنگ والا منہ تے منہ تے کارخانے دی مشیناں دی کالک نال بنیا ں لکیراں، اکھاں تو وگدے اتھرو تے نک توں وگدا سینڈھ اک مک ہوٗے اج وی کسی پرانی پیڑ وانگ میرے نال نال نیں۔ ایہہ 36، 37 ورھے پرانی گل اے۔ جدوں میں ایس 7، 8 ورھیاں دے نیانے نوں پہلی واری ایلومینیم دے بھانڈے بنان والے کارخانے وچ ویکھیا ۔ میل نال بھرے ہوئے بغیر بٹناں والا کرتا پاٗئے، جدوں اوہ لیراں وانگوں لمک دیاں کرتے دیاں بانہواں نال اپنا نک پونہجن دی کوشش کردا تےہور سوہنا تےمعصوم لگدا۔ پیراں وچ نیلن دے سلیپر پائے اوہ ابلدے کاسٹک سوڈے والے ڈرم دے کول کھلوتا سی۔ بھانڈیاں نوں دو دو کرکے چک دا تے دور سڑک کنڈھے قطار وچ وچھاٗئے بھانڈیاں نال اوہناں نوں جوڑ دا جاندا۔ ایہہ کارخانہ دوجے ہور کارخانیاں دے نال گوجرانوالہ دے کچے شیخوپورہ روڈ تے سی۔ میرا اوتھے آنا جانا اس کارخانے دے نال دے میرے بچپن دے یار کاکے دے کارخانے دی وجہ توں سی۔ جتھے ساڈا اک ہور سنگی وی سی جیہڑا ایلومینیم دے بھانڈے بنانوالے کارخانے دے مالک جنہوں سارے باؤ جی کہندے سن، اوس دا بھترئیا سی۔ سانوں ایس 7، 8 ورھیاں دے نیانے تے بڑا ترس آنا پر اینے بے وس ساں کہ کجھ کرنا تے دور نیانے دی حالت بارے فیکٹری مالک نال گل وی نئی ساں کر سکدے ۔ باؤ جی دے بھترئیے نے دسیاں کہ نیانا کارخانے وچ کم کرن والے اک مزدور دا پتر اے۔ ایس مزدور نے باؤ جی کولوں ادھار پیسےلتے پر نشے دی لت تے اجاڑ دتے تے پیسے موڑن دی تھاں گھروں نس گیا۔ باؤ جی نے پیسے پورے کرن لٗئی اوس دے پتر نوں کم تے لا لیا۔ کجھ مہینیاں بعد باؤ جی دا کم ای ٹھپ ہو گیا، تے تاں جا کے اس نیانے دی بیگار توں جان چھٹی۔ پر کیہ جان چھٹی؟ نہ باؤ جی ورگے کئی ہور ودھ کے جم پئے ہونے تے بیگار کٹن والے ایس توں وی وادھو تے ہن تک پہلاں توں وی ودھ کے پیدا ہو رہئے نئیں۔ ایہناں 36 ورھیاں وچ کجھ نہ بدلیا بلکہ جو سی اوہ وی کھس گیا۔ پر نا امیدی تے مسئلے دا حل نہیں۔ حل ہے تے صرف ایہہ کہ ہور زیادہ سیاسی ہوئے،،،ہور زیادہ اچی بولیے تے سوچیے،،تے نال راہ لبھئیے،، تے 7،7 تے 8،8، توں ہور چھوٹی تے وڈی عمراں دے نیانے تے نیانیاں نوں وگار توں کڈھ کے چھیتی توں چھیتی سکولاں وچ داخل کرائیے نہیں تے دکھ ہور ودھن گے، ہنیرے ہور گوڑھے ہون گے۔

اپنی رائے دا اظہار کرو

4 تبصرے “ودھدی کالک تے باؤ جی

  1. فوٹو وڈی تے چھوٹی دی گل نھیں ۔۔اوھدے ہیٹھ کی لکیھیاں اے اوہ matter کردا اے تے سجن نال مسلسل کم کرن دی جڑت ۔جو لکھے گا اوہ دی مرزی لاہے یا نا لائے۔۔۔۔سجن تے سب دا سجن اے ————-

تبصرے بند ہیں