515

لاہ انہیرہ جہل برے دا چانن لا عقل دا

لکھاری
ناہید مہدی
شروع شروع وچ سوشل میڈیا تے میں کئی وکیلاں ولوں آون والیاں درخواستاں اتے اوہناں نوں اپنے سجناں دی لسٹ وچ رلا لیندی ساں۔ سوچی دا سی بئی ایہہ پڑھے لکھے لوک نیں تے اوہناں دی سوچ وہ شائد نکھری ہووے۔ آخر وکیل بنے نیں کجھ نہ کجھ پڑھ لکھ کے تے سکھ سکھا کے ایس شعبے وچ آئے ہوون گے۔
آکھیا جاندا اے بئی عدالت انھی ہوندی اے تے ایس لئی وکیل نوں ہر پاسے دھیان کرنا پیندا اے تے اپنی را نوں اک پاسے رکھ کے تے نر پکھ ہو کے قانون نوں اچا رکھنا پیندا اے۔
مینوں ایہہ وی آس سی بئی ایہناں سجناں کولوں کوئی پڑھی لکھی تے سمجھداری والی را ملے گی جیہڑے نمایاں دے نال تے ظلم دے خلاف کھڑے ہوون گے تے پاکستان دی ترقی اوہناں دی نظر وہ ہووے گی۔
بڑے ہرکھ نال ایہہ کہنا پے رہیا اے بئی بڑی مایوسی ہوئی۔ مینوں ہن پتہ لگا بئی کئیں وکیل تے جعلی ڈگریاں چکی بھوندے تے قانون دی ماں بھین ایک پئے کر دے نیں۔ جہناں کولوں قانون دیاں ڈگریاں نیں اوہناں نوں وکیل دا منشی وی نہیں ہونا چاہیدا سی۔
کئیاں نے قانون دی ڈگری لے کے مجھاں گاواں دا گوہاں چکن توں تے جان چھڈا لئی پر اپنے دماغاں وچ اوہ اصل ایہو کجھ ہی لئی پھر دے پئے نیں۔ ہن اوہ ایس گوہے نوں تھاؤں تھائیں کھلار دے پئے نیں۔

‎پاکستان وچ ہر دوجے شعبے وانگوں ایہہ وی الحمد اللہ، ماشا اللہ آکھ کے جھوٹھ بولن والے ہذا فضل ربی تے ہل من مزید دی ہوس وچ اپنی دو مونہی جیبھاں نال لوکائی دا لہو پیندے پئے نیں۔
ایہناں دے ڈھڈاں وچ حرام دی کمائی دے نال نال ڈیڑھ ڈیڑھ گٹھ لمی داڑھی اے تے اکھاں اتے مذہب دے تعصب دی پٹی بدھی اے۔ ایہہ لوک انصاف دے دلال تے وپاری نیں۔
زنانیاں دی کھلھ بارے جیہڑے وچار ان پڑھ لوکاں دے نیں بالکل اوہی اوہناں دے نیں۔ تعلیم لکھائی پڑھائی نے یاں تے ایہناں دا کجھ نہین وگاڑیا یاں پھیر ایہناں نوں پڑھایا ای ایہہ کجھ گیا اے۔
ڈر لگدا اے بئی جے کوئی زنانی اپنے نال ہوون والے دھرو یاں طلاق دا کوئی مقدمہ لے کے ایہناں کول جاندی ہووے گی تے ایہہ اوہناں نمانیاں نال کیہ کر دے ہونے نیں۔ ابے دے نظام دا دتا احساس ایہناں دے دلاں اتے رچیا اے تے ایہی ایہناں دی اکھاں اتے اتریا اے۔
اناللہ واناالیہ راجعون
‎‎ ‎پھر میں سوچیا بئی کجھ میڈیا دے لوک وی ایڈ کرنے چاہیدے نیں آخر ایہہ لوک وی ساڈی اکھیاں تے کن نیں۔ ایس کر کے آس اے بئی ایہناں وچ عقل شعور دوجیاں نالوں ودھ ہونا اے۔ ایتھے وی خوش فہمی چھیتی ای دور ہو گئی بئی کدی سکول دا منہ نہ تکن تے کتاب نہ کھولن والے وی کن اتے قلم لایاں صحافی بنے پھر دے ویکھے۔
‎زنانیاں نوں ایہہ برادری دے لوک وی پیر دی جتی تے بے عقل ڈنگر سمجھدے نیں۔ جگتاں تے گندیاں چوبڑاں لا کے ایہہ سمجھدے نیں بئی ایہہ وسیب دی اگوائی پئے کر دے نیں۔ صحافیاں دی ایہہ ٹولی مذہب تے رسماں دے پچھ لک کے زنانیاں نوں باندیاں بنائی رکھنا دی جتن وچ لگے نیں۔
زنانیاں دے عالمی دیہاڑ نے قسم قسم دے ڈڈواں دے مکھ ننگے کر دتے نیں تے ایہ چمونے ہن ایدھر تے کدی اودھر لڑے دی پھر دے نیں۔
کجھ لکھاری بارے
محترمہ ناہید مہدی سرگودھا وچ جمے تے پنجاب یونیورسٹی وچ تعلیم لین مگروں برطانیہ ٹر گئے تے ہن اوہ زنانیاں دے حقاں لئی کم کر دے نیں۔

اپنی رائے دا اظہار کرو

2 تبصرے “لاہ انہیرہ جہل برے دا چانن لا عقل دا

    1. سجاد بٹ صاب
      کوشش کرو اپنی رائے ماں بولی وچ پیش کرو
      جیوندے رہو

تبصرے بند ہیں