475

قیامت کدوں آؤنی اے

لکھاری
اسلم ڈوگر
آکھدے نیں بئی خورے کدوں قیامت آؤنی اے؟
کیہہ ایہہ قیامت نہیں بئی اسی ایہہ آس لائی بیٹھے آں کہ عمران خان ملک وچ کوئی تبدیلی لیاوے گا؟
کیا ایہہ قیامت نہیں بئی اسی ایہہ سوچی بیٹھے آں بئی نواز شریف پاکستان وچ قوماں، زباناں تے رہتلاں نوں بچاون دی آہر کرن گے؟
کیہہ ایہہ قیامت نہیں بئی ساڈے خزانے دا راکھا آصف علی زرداری اے؟
کیا ایہہ قیامت نہیں بئی ہر اوکھے ویلے تے حکومت دی بس توں چھال مار کے لٹن والیاں وچ شامل ہو جاون والی ایم کیو ایم توں سانوں ایہہ آس اے بئی اوہ کدی لوکاں دی گل وی کرے گی؟
کیا ایہہ قیامت نہیں بئی اسی پھوکاں دا کاروبار کرن والے پیراں تے درباراں دے گدی نشیناں توں آس لائی بیٹھے آں بئی اوہ ایس ملک وچ جہالت مکاون لئی کوشش کرن گے؟
کیہ ایہہ قیامت نہیں بئی اسی جاہل تے ان پڑھ استاداں کولوں اپنے بالاں نوں پڑھا کے بالاں توں امید رکھدے آں بئی اوہ جگت پدھر اتے جا کے مقابلہ کرن گے؟
اپنے نکے نکے بالاں نوں مدرسے دے غیر تربیت یافتہ مولویاں دے ہتھ پھڑاندیاں سانوں قیامت نظر نہیں آؤندی؟
کیہہ ایہہ قیامت دی نشانی نہیں بئی اسی نرا ووٹاں دی پرچی ، چوناں والے دیہاڑے جا کے صندوقچی وچ پاون نوں ای جمہوریت من لیا اے؟

اپنی رائے دا اظہار کرو