839

جتن جتن ہر کوئی کھیڈے، ہارن کھیڈ فقیرا

انسان دی فطرت اے اوہ کامیابی تے جت لئے میدان وچ اتردا اے کسے وی کم وچ ناکامی یا کوئی اجیہا کم جس نال کوئی فیدہ نہ ہووے، اوس نوں ہتھ نئیں پاوندا۔ کیہ ہارن والیاں دا موقف،سوچ تے عمل غلط ہوندا اےا؟ اوہناں دا ساتھ دینا یا حمایت کرنا غلط اے؟
انسان نری جت دے نشے وچ کیوں رہندا اے، اوس نوں حیاتی وچ ہار ویکھن نوں ملدی اے فیر وی اوہ ہمت نئیں ہاردا تے کامیابی لئے نویں سرے نال جتن کردا اے۔ شکست دا سبق اوہی جان سکدا اے جنہیں ہار دا رجھواں مزہ لتا ہوندا اے، اوس ہار نوں دلوں قبولیا ہووے۔ اوہ جاندا ہووے کتھے کتھے اوس غلط پیر پٹے تے اگے توں اجیہی غلطی نئیں کرنی۔ اپنی سوچ نوں ہور چنگا کرکے اگے ودھنا اے تے سچی کامیابی کٹھی کرنی ہووے گی۔
ایہہ گل نری الیکشن، ووٹ، امیدوار دی جیت ہار، سرکار بناون تے اقتدار ملن تک ہی نئیں، زندگی دے کسے وی کھیتر وچ پوری طرحاں لاگو ہوندا اے۔ جے اسیں جیت دی خاطر کوئی وی غلط ذریعا ورتدے آں۔ جیہدے کے اسیں عادی وی ہوچکے آں۔ ایس دے اگے آون والے نتیجے چنگے نئیں ہوندے، اجیہی جیت یا کامیابی ساڈا دور تیک ساتھ نئیں دے پاندی۔ کیوں جے اسیں ایہدے کسے حد تیک حق دار وی نئیں ہوندے۔
ہار وچ جس گل نوں لبھن دی لوڑ اے، اوہ مخالف دا تہاڈے اتے وسا اے، اوہ کناکو آپ نوں اپنا دشمن یا مخالف من دا اے۔ اوہ مقابلے وچ کیہڑے ہتھیار ورتدا اے۔ کیہ اوس وی ناجائز ہتھکنڈے سنبھالے نیں۔ تے فیر جان لوو، اوہ وی اوہوجیہی غلطی کرے گا، جس پاروں تہانوں مونہہ دی کھانی پئی سی۔ جے اوہ اجیہا کم نئیں کردا اور صحیح پیر پٹ دا اے،فیر مقابلہ نہ صرف سخت ہوسکدا اے سگوں اگے لئے وی مسئلے پیدا کرسکدا اے۔ سبھ توں ودھ ایہہ کے اپنے سنگی ساتھیاں نوں گھٹ ناں ہوون دیو۔ جے آپ تے وسا کرکے کلے میدان وچ اترو گے تے تسیں کدے جنگ نئیں جیت پاو گے۔
جتھے جیت نوں برقرار رکھنا مشکل اے اوتھے ہار قبول کرنا وی مشکل اے۔ بزرگاں ایس لئی آکھیا اپنی ہار دلوں قبول کرو مگر دل نال مت لاو۔ ایس وچ اپنی اگلی جیت دا راہ لبھو۔
بندہ جتن والے دے پچھے لگ جاندا اے، جے اوس دے ہم خیال او تے ٹھیک، جے نری جیت کارن رل گئے فیر سوچن والی گل اے۔ اپنی سوچ تے فکر دا کجھ ویروا کرن دی لوڑ ہووے گی۔ تہاڈی سوچ والا میدان وچ بوہت پچھے رہ گیا، اوہدے نال رہن تے اوس دا بھرواں ساتھ دیون دے طریقے لبھو۔
ایہہ کوئی خیالی گل نئیں صرف اصولی اے۔ زندگی وچ ایہہ اصول ای انسان دے مضبوط فیصلیاں دا کارن بن دا اے۔
ریاستی ادارے،جماعتاں، گروپ، تنظیماں کدے اپنی ناکامی دا سوچ نئیں سکدیاں، اوہناں نوں ہمیش اپنی کامیابی پیاری ہوندی اے۔ ایہہ لوک زندگی دے مقداں وچ ہارے ہوندے نیں۔ اوہناں نوں جیت دا چس لگ جاندا اے۔ ایس نوں قومی جذبے دا ناں دتا جاندا اے۔ فتح مند نوں موڈھیاں اتے چکیا جاندا اے ہارن والیاں اتے وٹے مارے جاندے نیں۔
اسیں اپنی ہار اتے مونہہ لکاندے آں، کیہ ایہہ اچنبے والی گل اے۔ ہارن والے دا سواگت کیوں نئیں کیتا جاندا۔ اوس دا حوصلہ ودھان نوں اگے کیوں نئیں آندے۔ تبدیلی دی گلاں سبھ کردے نیں آپ نوں گھٹ ای بدل دے نیں۔ ہار دا خوف دل وچ پال کے میدان وچ اترن والے کھڈاری ماڑے ہوندے نیں۔ ایہہ خوف نئیں سچ اے۔ بہادری نال مقابلہ جگرے والے ای کردے نیں۔ جنہاں نوں جت دی فکر نئیں ہوندی۔ اوہ درویش تے فقیر ہوندے نیں۔ اینہاں بارے آکھیا گیا اے۔

جتن جتن ہر کوئی کھیڈے، ہارن کھیڈ فقیرا
جتن دا مُل کوڈی پیندا، ہارن دا مُل ہیرا

اپنی رائے دا اظہار کرو