359

بے وقوف نی گھوڑی

لکھاری
عبدالکریم قادری

بے وقوف نی گھوڑی
اِک بیٹھا تے ہلی ناں
تے دو بیٹھے تے دوڑی
بے وقوف نی گھوڑی
سیانے آخنے کہ کسے گراں وچ کوئی بندہ بُوں بے وقوف سا، اُس اِک گھوڑی رکھی وی سی، جیڑی اُس بے وقوف کول اشنے تُوں پہلے چنگی پلی سگھڑ قسم نی گھوڑی سی، پر اُس نی قسمت مٹھی سی جے اس بے وقوف نے ہتھے چڑی گئی۔ بندہ بڑا بے وقوف جیا سا، گھوڑی اُس نال رئی رئی تے بے وقوف ہونا شروع ہوئی گئی۔ تے اک ٹائم اے وی آگیا کہ گھوڑی اوپراگراک بندہ بینا سا تے اوہ ہلنی جلنی وی نِی سی جبکہ دو بندے بیٹھنے سے تے تیز دوڑن لگی پینی سی۔ اس وچ اُس بے چاری گھوڑی نی کسے قسم نی کوئی غلطی نی سی بلکہ بے وقوف مالک نی بے وقوفیاں نی شکار ہوئی گئی سی۔ تہ آخنے ناں مطلب اے آ کہ بے وقوف بندہ آپنے آستے تے تھیا ای اے بے وقوف پَراُس نیاں بے وقوفیاں نال کئی ہور وی بے وقوف ہوئی گشنے، چاہے او جانور ای کیاں ناں وین۔ تے تساں آستے ماڑا اے مفت مشورہ اے کہ بے وقوفاں کولوں اجتناب کرسو، نئی تہ تُساں وی بے وقوف ہوئی گیسو۔ جتھے جُلو، جتھے بَیو کھلو، سجـے کھبے نظر ماری کِنـے کرو کہ ایتھے کوئی بے وقوف بندہ تے نی بیٹھا وا، تے جے کوئی بے وقوف بندہ بیٹھا وا تے جب تک تُساں اُتھوں اُٹھنے نئی او، اپنے آپ کی وی بے وقوف ای سمجھو۔ اُٹھی دوڑ لائو، نَسـو جتنی سپیڈ نال نَسی سکنے یو۔ اے تے اوئی اک گل تے دوئی گل اے وے کہ اے وی تہ اوئی سکنا کہ جتھے تُساں بیٹھے وے یو، اتھے کوئی ہور بے وقوف ناں وے، تُساں کی چھوڑی تے، اس صورت وچ اُتھوں کسے کی اٹھن ناں دیو بلکہ زبردستی بالو، اُس کی بٹھائو،کسے کی ناں جُلن دیو، کیاں کہ جس طرح چراغ نال چراغ جلنا، اسے طرح بے وقوف نال بے وقوف بننا۔ تے دنیا وچوں اگر بے وقوف ختم اوئی گئے تہ فیر سیانے تہ عقلمند بھوکے مری گیسن، جب تک بے وقوف تھئے، عقلمنداں نیاں وی روٹیاں لگیاں ویاں۔ بے وقوفاں کی ہور بے وقوف بنائی جائو تے اپنے وارے نیارے کری جائو۔
سمجھ آئی نے کہ نئیں؟؟؟

اپنی رائے دا اظہار کرو

2 تبصرے “بے وقوف نی گھوڑی

تبصرے بند ہیں