بلیک ہول تے ساڈے مسئلے

لکھاری
عبید اللہ چودھری

تازہ تازہ فوٹو تے خبر آئی اے بئی “بلیک ہول” دا سائز 40ارب کلو میٹر ہے اے۔ کئی سجن بیلی سوشل میڈیا تے اس گل تے بحث کر رہے نیں۔ مینوں سمجھ نہیں آ رہی کہ ساڈے کول نا بجلی اے تے نا ای پانی ! نا تیل اے تے نا ای گیس! تے بلیک ہول دی بڑی فکر اے کہ اوہدا سائز کیہ اے تے اوہ زمین تو کِنا دور اے۔
4-5ورھے پہلے دی گل اے میرا ٹیکنالوجی دی اک وڈی یونورسٹی دی تقریب وچ جاون ہوئیا۔ یونیورسٹی وچ 122 پی ایچ ڈی استاد سن تے یونیورسٹی اپنے ہزار ریسرچ پیپر مکمل ہون دا جشن منا رہے سن۔ اوہناں دی بد قسمتی کہ مینوں چرچا کرن لئی سٹیج تے بلا لیا۔ میں مبارک دیتی تے اک سوال پوچھ لیا؟ اس اک ہزار ریسرچ پیپراں دے نال پاکستان یا دنیا دے کسی وی انسان دی زندگی وچ کیہ بہتری آئے گی؟ فیر ڈین توں وائس چانسلر صاحب تائیں کسے کولوں بس ایس اک سوال دا جواب نہ لبھا تے سارے ای اک دوجھے دا منہ تکن لگ پئے۔ میرے خیال وچ ساڈا ایہہ قومی مسئلہ اے کہ اسی وڈیاں وڈیاں گلاں تے منصوبیاں دی گل کردے آں۔ پر روٹی ، کپڑا ، مکان ، تعلیم، صحت، صفائی ، روزگار دا حل کڈھن دی تھاں اسی دنیا تے حکمرانی دا منصوبے توں تھلے گل ای نہیں کر دے۔ ایس طرح تے روٹی ، مکان تے روزگار دا مسئلہ اگلے سو سال وی حل نہیں ہو سکدا! حکومت نوں اللہ دا واسطہ اے، ایس دنیا نوں دنیا ای رہن دیو، پاکستان نوں ایماندار تے صاف شفاف جنت بناون دی کوشش دا انجام اسی 70 ہزار جاناں دے کہ ہن تک بھگت رہے آں۔