462

اپوزیشن جماعتاں دا اتحاد ہوون ول گل ٹر پئی

لہور(ویروا اسلم ڈوگر) پاکستان پیپلز پارٹی دے چیرمین بلاول بھٹو زرداری نے اپنے وفد قمر زمان کائرہ، جمیل سومرو، مصطفی نواز کھوکھر، علی قاسم گیلانی تے سید حسن مرتضی سنے پیر والے دیہاڑے پچھلے وزیر اعظم تے پاکستان مسلم لیگ نون دے آگو نواز شریف نال کوٹ لکھپت جیل وچ ملاقات کیتی۔
ایہہ ملاقات ہوئی تے نواز شریف دی صحت خراب ہوون دی وجہ توں اے پر ایہہ کیویں ہو سکدا اے بئی دو سیاسی آگو ملن تے سیاست تے گل نہ ہووے۔
پاکستان تحریک انصاف دی حکومت نوں ایس ملاقات تے بڑی فکر لگ گئی اے۔ لہور وچ پہلوں ای ایہہ گلاں سنیاں جا رہیاں سن بئی پنجاب دی حکومت جیہڑی اپوزیشن دے نال نال کجھ سرکاری آگواں دی نظر وچ وی ناکام ہو گئی اے، اوس نوں بدلن دیاں کوششاں ہو رہئیاں نیں۔
نواز شریف دی صحت واقعی خراب ہو رہئی اے تے دل دا روگ ایہو جئیا ہوںدا اے ایس وچ روگی اک دم مر جاندا اے۔ رب نہ کرے بئی پاکستان وچ کوئی ایہو جئیا واقعہ ہووے تے ایس طرح ایس ریاست نوں کوئی نقصان ہووے۔
آکھیا جاندا اے بئی نواز شریف نوں قانون موجب سزا ہوئی اے پر لوک ایس گل نوں منن لئی تیار نہیں۔ اوس دی مثال اوہناں نوں پنجاب وچ ملن والے ووٹ نیں۔
پاکستان پیپلز پارٹی اجےتائیں اعتزاز احسن ورگے لوکاں دے ناں نال لہور وچ پچھانی جاندی سی۔ اعتزاز احسن نوں لوک پڑھیا لکھیا سے سیانا آگو سمجھدے نیں۔ پر نواز شریف دی گھر والے کلثوم نواز دی بیماری ویلے اوہناں کجھ ایہو جئیاں گلاں کیتیاں جیہدے نال لوکاں دے دل وچ اعتزاز احسن بارے ایہہ گل آ گئی اے بئی اوہ نواز شریف دے سیاسی مخالف دی تھاں اوہناں دے ویری بن گئے نیں۔
اعتزاز احسن نے پچھلے دناں نواز شریف دی بیماری بارے وی اوہو ای گل کیتی بئی نواز شریف مکر کر رہئے نیں۔
بلاول بھٹو نے جان بوجھ کے اعتزاز احسن ورگے لوکاں نوں ملاقات توں دور رکھ کے ایہہ دسیا اے بئی پیپلز پارٹی مسلم لیگ دے نال اکٹھ کرنا چاہندی اے۔

بلاول بھٹو دا ایہہ آکھنا بئی جیل وچ ہوئی ملاقات وچ اوہناں نواز شریف نال میثاق جمہوریت تے وی گل کیتی تے نالے اوہناں نوں لگ رہیا اے بئی نواز شریف سودے بازی نہیں کر رہئے سگوں اپنے اصولاں اتے ڈٹ گئے نیں۔
ایس گل توں لگ دا اے بئی پاکستان پیپلز پارٹی اپنے ولوں مسلم لیگ لئی دل صاف کر چکی اے تے ہن دواں جماعتاں دا اک مٹھ ہونا کوئی دور دی گل نہیں لگ رہئی۔

اپنی رائے دا اظہار کرو