316

اٹھواں رنگ۔ محمد شجاع الدین

پتر دے وچھوڑے دا زخم ڈھڈا ہوندا اے ایہہ چھیتی نئیں بھردا۔ زمانے دی دھپ چھاں وی ایس نوں مکا نئیں سکدی۔ ایہہ پھٹ بندے دے اندر لگدا اے اوس دے نال ای قبر وچ جاندا اے۔
پتر نرے ماواں دے ای نئیں ہوندے، اوس دا لاڈ سبھ نوں وکھائی دیندا اے، جدی چاروں پاسے دھوم مچی ہوندی اے۔ اصل جوڑی تاں پیوپتر دی ہوندی اے۔ پیو اپنا ایہہ مان تے فخر بڑے سوہنے راز وانگ اپنے اندر لکایا ہوندا اے۔ ایس پاروں کسے نوں وکھائی نئیں دیندا۔ سچ ایہہ وے پئی باپ دے سینے دی چوڑائی اوس دے پتر دی جوانی دا پتہ دس دی اے۔ جے ایہہ جوانی کسے سڑک اتے حادثے دا شکار ہوجائے تاں ایہو چھاتی دکھ تے غم نال پھٹ پیندی اے۔
کجھ اجیہی قیامت قمر زمان کائرہ اتے وی بیتی ہووے گی۔ جد اوہناں نوں جوان منڈے دی موت دی اذیت دین والی خبر ملی ہووے گی۔
ایسے وقوعے دی خبر نے میرے ورگے کئی بالاں دے وچھوڑے دا زخم سینے وچ سانبھن والیاں نوں اک وار فیر اوہ ویلے یاد دوادتے۔ جنہاں دے پیارے سڑکاں اتے نٹھ دی موت دے مونہہ وچ ٹرگئے۔ ستمبر 1967 دا اک حادثہ یاد آ گیا جدوں وڈے بھائی صاحب محمد ضیاالدین دنیا توں ٹرگئے۔ پائیلٹ سکول وحدت روڈ وچ ستویں جماعت دے پڈھیار تے سکاوٹ ہوندے ساں۔ نکے ہوندیاں دی گل اے سکاوٹ کیمپ لئی مری گئے ساڈے بہن بھائیاں لئی سیٹی والی پنسلاں لے کے آئے۔
ہالے کجھ دناں پہلاں دی گل اے میری بیگم خاکی کرتہ میرے سامنے لہرایا تے پچھیا کجھ یاد آیا؟ کجھ کیہ مینوں سبھ چیتے سی، ایہہ کرتہ بھائی ہوراں دی سکاوٹ یونیفارم دا حصہ سی۔ خاکی نکر، خاکی کرتہ، سکارف، چاقو، سیٹی۔ ایہہ سبھ کجھ 50 ورھے توں میں ٹرنک وچ سانبھ کے رکھیاں سی۔ والد صاحب 1997 وچ سانوں چھڈ کے اگلے جہان ٹرگئے۔ 30 ورھے تیک وڈے پتر دی حادثاتی موت مگروں ہرورھے ستمبر وچ اوس دی فاتحہ پڑھاندے۔ وچھڑن والیاں دی یاداں دے نال ای اینہاں غماں نوں وی اپنے اندر پال کے رکھنا پیندا اے۔
ایرانی ماہر فلکیات قطب الدین شیرازی یاں فیر اوس دے خاص شاگرد کمال الدین الغراضی بارے کہندے نیں اوہناں سترنگی ۔۔ دھنک یاں قوس قزح نوں لبھیا۔ ایہہ ست رنگ لال۔۔ مالٹائی ۔۔ پیلا ۔۔ سبز ۔۔ نیلا ۔۔ جامنی تے گوڑا نیلا ہوندا اے۔ نیوٹن نے ثابت کیتا کہ سفید روشنی چٹا چانن اینہاں ست رنگاں نال مل کے بن دا اے۔
قدرت دے ایہہ رنگ ہر ویلے رہندے نیں۔ لیکن آبشاراں تے فواریاں دے آل دوالے ست رنگی بن جاندی اے۔
انسانی حیاتی وچ وی عید خوشی دے دیہاڑ موسمی پھل آون، لنگھے ویلے، یاں فیر کلے بیٹھے اپنے پیاریاں دی یاد دے رنگ گوڑے ہوجاندے نیں۔
سائنس دس دی اے پئی سورج دی کرناں جد بارش دے قطریاں وچوں ٹکراندی اے تاں ست رنگی بندی اے۔ پلکاں توں ڈگن والے موتی وانگ اتھرو دا جائزہ لیتا جاوے تاں کجھ اجیہی مورت بندی اے۔ ایہدے وچ وچھڑن والیاں دی یاداں دا رنگ وکھائی دیندا اے۔ جیہڑا کدے پھیکا نئیں پیندا۔
دور دیس ٹر جاون والا قمر زمان کائرہ دا پتر ہووے یا چودھری صلاح الدین دا۔ اوہ ہمیش زندہ رہندا اے۔ کدے نئیں مردا۔ کیوں جے وچھڑن والیاں دیاں یاداں نوں زندگی دا اٹھواں رنگ آکھیا جاندا اے۔ جیہڑا مٹ دا نئیں۔ قبر وچ نال جاندا اے

اپنی رائے دا اظہار کرو