471

سوڈان چ اپوزیشن خلاف کریک ڈاؤن، 108 ہلاک، خانہ جنگی دا خطرہ

خرطوم (انٹرنیشنل میڈیا) سوڈان چ جمہوریت حامیاں خلاف سوموار والے دیہاڑ توں جاری ملیشیا فورسز دے کریک ڈاؤن چ مَرن آلیاں دی گنتی 108 ہو گئی جد کہ سینکڑاں لوک زخمی ہو گئے، ملک چ خانہ جنگی دا خطرہ۔ اپوزیشن اتحاد نے ملک تے قابض فوجی عبوری کونسل نال اقتدار دی منتقلی بارے معاہدہ ٹُٹن مگروں دارالحکومت خرطوم چ کئی دیہاڑ توں احتجاجی دھرنا دے رکھیا سی۔ عبوری حکومت تے اپوزیشن وچکار مذاکرات ناکام ہون پاروں احتجاج کرن آلیاں خلاف 3 دیہاڑ پہلوں کریک ڈاؤن شروع کر دِتا گیا جیہڑا حالے تائیں جاری اے۔ “سنٹرل کمیٹی آف سوڈان ڈاکٹرز” دے بیان موجب نیل دریا وچوں 40 لاشاں لبھیاں نیں۔ انٹرنیٹ سروس بند اے، فون کال تے پیغام رسانی چ اوکڑاں ہین۔ عبوری کونسل دی ملیشیا میڈیا بلیک آؤٹ چ دارالحکومت خرطوم سَنے پورے ملک اندر گھراں چ وَڑھ کے نہتے لوکاں دا قتلام کر رہی اے تے اوہناں نوں ڈرا دھمکا رہی اے۔
چیتے رہوے کہ سوڈانی معزول سرکار خلاف پچھلے ورھے توں عوامی احتجاج ہو رہیا سی حیہدے کارن گذرنے اپریل فوج نے صدر عمر حسن البشیر دی 30 ورھیاں توں قائم سرکار دا تختہ اُلٹ کے اقتدار تے قبضہ کر لیا، ملک چ 2 ورھیاں لئی عبوری حکومت دا اعلان کر دِتا تے 3 مہینے لئی ایمرجنسی لا چَھڈی۔

اپنی رائے دا اظہار کرو