سری لنکا خلاف وی ( 20 ) کھڈاریاں دے نانواں دا اعلان

(اسلام آباد )پاکستان کرکٹ بورڈ(پی سی بی) نے سری لنکا دے خلاف سیریز توں پھلاں لگا ئے جاون والے کیمپ لئی 20 کھڈاریاں دے نانواں دا اعلان کردتا اے ۔ جس وچ عمر اکمل تے احمد شہزاد دے ناں وی شامل نیں ۔ہیڈ کوچ تے چیف سلیکٹر مصباح الحق نے 18ستمبر نوں لہور وچ نیشنل کرکٹ اکیڈمی وچ لگے کیمپ وچ اعلان کیتا سی ۔ایہ کیمپ سری لنکا دے خلاف کھیڈی جاون والی سیریز دی تیاری دا حصا اے تے ایس کیمپ وچوں ھی کھڈاریاں دی چون کیتی جاوے گی۔ مصباح الحق ہفتے نو ں ساڈھے گیاراں وجے ون ڈے تے ٹی20 سیریز لئی اسکواڈزدا اعلان کرن گے۔اس کیمپ وچ احمد شہزاد تے عمر اکمل نوں بھوں چر بعد کیمپ وچ رلن دا سد ا دتا گیا اے پر محمد حفیظ اتے شعیب ملک نوں کیمپ وچ رلن توں ڈک دتا گیا اے کیونجے ایھناں دونواں کھڈاریاں نوں پی سی بی نے کیریبیئن پریمیئر لیگ وچ رلن لئی 12اکتوبر تائیں این او سی جاری کیتا ھویا اے ۔کیمپ لئی جنھاں کھڈاریاں دا اعلان کیتا اے اوھناں وچ کپتان سرفراز احمد، نائب کپتان بابر اعظم، احمد شہزاد، فخر زمان، امام الحق، عابد علی، آصف علی، عمر اکمل، حارث سہیل، افتخار احمد، محمد رضوان، فہیم اشرف، حسن علی، عماد وسیم، شاداب خان، محمد نواز، محمد عامر، محمد حسنین، عثمان شنواری تے وہاب ریاض شامل نیں ۔