بینظیر دے ناں اتے لما ای پھڈا۔۔۔

بینظیر انکم سپورٹ پروگرام توں سابق وزیراعظم بینظیر بھٹو دا ناں کڈھن دی حکومتی کوشش اتے نواں میچ پے گیا اے۔ پیپلزپارٹی تے حکومتی لیڈراں نے اک دوجے دے خلاف لفظاں دیاں توپاں دے منہ کھول دتے نیں۔ حکومتی دھڑا پاکستان ویلفیئر پروگرام یا فیر قائد اعظم دے ناں توں غریباں دی مدد دے ایس پروگرام نوں اگے ٹورنا چاہندا اے جدکہ پیپلز پارٹی ایہدی مخالفت لئی پورے زوراں نال میدان وچ آگئی اے۔ پارلیمینٹ توں منظور ہونے ایس پروگرام دا ناں بدلن لئی مڑ پارلیمینٹ جانا ضروری اے، جتھے قومی اسمبلی وچ حکومتی کوشش کامیاب ہوگئی تے سینیٹ وچ پیپلزپارٹی ایہدا راہ ڈک سکدی اے۔