ورلڈکپ وچ ہارن دیاں مزید وضاحتاں

پاکستان ٹیم دے بلے باز امام الحق تے بابراعظم وی ورلڈکپ وچ ہارن دی وضاحتاں پیش کردتیاں۔ امام الحق پہلاں ای دس چھڈیا پئی اوس دا چچا چیف سلیکٹر انضمام الحق پہلے میچاں وچ ہار دا ذمہ وار نئیں، کھڈاریاں رجھ محنت کیتی سی ایس دے باوجود نتیجہ چنگا نئیں آیا، امام الحق اپنی کارگزاری نوں وی چنگا آکھیا تے کہندے نیں جتھے لوکیں تنقید کردے نیں اوتھے اوہناں دی کھیڈ نوں لوکیں پسند وی کردے نیں۔ ٹیم وچ اپنی موجودگی نوں چیف سلیکٹر چاچے دا کارن منن توں وی انکار کردتا۔
بابراعظم دا آکھنا سی میں ہمیش چنگا کھیڈ پیش کرن اتے دھیان دتا، اسیں پوری تیاری نال میدان وچ اتردے ساں، صرف ماڑی اوہدوں ہوندی جدوں اگے پچھے سارے آوٹ ہوجاندے ساں، اسیں آسٹریلیاں توں وی جت سکدے ساں ، دوناں بلے بازاں ویسٹ انڈیز خلاف شکست تے بھیڑا رن ریٹ ورلڈکپ وچ ہار دا کارن دسیا۔