بھارت نال میچ: وسیم اکرم دے کپتان نوں مشورے

مانچسٹر: پاکستان ٹیم دے پچھلے کپتان وسیم اکرم نے سرفراز احمد نوں صلاح دتی اے کہ اوہ بھارت خلاف بہادری نال فیصلے کرن تے شیراں وانگ ٹیم دی قیادت کرن۔ جیو نیوز نال گل بات کردیاں وسیم اکرم آکھیا کپتان نوں جانکاری ہونی چاہیدی اے جے کر ٹیم ہاری تاں ساری تنقید اوہناں اتے ہووے گی، ایس لئی فیصلے دلیری نال کرن۔
سرفراز نوں کسے ڈر توں اتے ہوکے کھیڈنا پوے گا، کہ کدھرے اوہناں نوں کپتانی توں نہ ہٹادتا جاوے، کھڈاری نوں شکست دے خوف توں بغیر میدان وچ اترنا ہووے گا۔
وسیم اکرم مشورہ دتا پئی بھارت نال میچ توں اک دیہاڑ پہلاں اپنی ٹیم فائنل کرلین، تاں جے اوہناں دا اعتماد خراب نہ ہووے۔ اوہ ذہنی طور اتے تیار رہن۔
ورلڈکپ وچ پاکستان بھارت توں ہمیش کیوں ہار جاندا اے، ایس دے جواب وچ وسیم اکرم دا آکھنا سی، ایہدے جواب کسے کول نئیں، ایہہ گلاں نریاں میڈیا وچ ہوندیاں نیں۔ پلیئرز دے ذہن وچ ماضی نئیں ہوندا، اوہ نرا میچ دا سوچ کے میدان وچ لیندا اے۔
سابق کپتان نےآکھیا انڈیا خلاف میچ وچ بولرز نوں لائن تے لینتھ دا خیال رکھنا ہووے گا، ٹی ٹوئنٹی والی بولنگ ایس فارمیٹ وچ نئیں چل سکدی، ورلڈ کپ مگروں ضروری اےکہ پلیئراں نوں فرسٹ کلاس وچ لینتھ بولنگ دی پریکٹس کرائی جاوے۔ انڈیا کول بولنگ وچ چوکھی ورائٹی اے ، اسپنرز وی چنگے نیں۔ فاسٹ بولرز وی ٹاپ کلاس ہن، جدکے بلے بازی انڈیا دی چوکھی اے۔ شیکھر دھون دے نہ ہون نال انڈیا نوں فرق پئے گا
اک سوال تےوسیم اکرم آکھیا اوہناں دا دل کہندا اے پاکستان میچ جیتے لیکن دماغ کہندا انڈیا جت جاوے گا، انڈیا داپاکستان اتے 30-70 دا چانس اے۔