اج ماں بولی دیہاڑ اتے وڈے بھائی امجد سلیم منہاس ہوراں سارے یار بیلیاں نوں سدا دتا سی کہ پئی لہور پریس کلب اکٹھے ہوکے اس دن دی مناسبت نال ریلی پنجاب اسمبلی تیک کڈھی جاوے گی۔ اوس وچ سبھ شریک ہوواں گے۔ وڈے بھائی صوفی خاور جنہاں دی اج کل سرحد پار پنجابیاں نال وی چنگی یاریاں بن گئیاں نیں۔ سوشل میڈیا اتے بڑے رابطے بن گئے نیں اوہناں وی اوتھے اپڑن دی خواہش دسی۔ میں ہمت پھڑی کیوں جے کجھ ساڈا وی اپنی ماں بولی نال واسطہ رہیا اے،
تن دن پہلاں اک کولیگ مینوں سوال کیتا تسیں بڑی دیسی پنجابی بولدے او، تہاڈا پچھوں کیہڑا پنڈ اے، میں اوس نوں دسیا پئی میری جم پل لہور شہر دی اے، تے مینوں اپنے شہری ہوون تے کوئی بوہت فخر نئیں، لیکں ایس گل دا وڈا مان اے پئی میں پنجابی بول دا آں تے ایس نوں سمجھن تے جانن دی خواہش رکھدا آں۔ ایسے جنوں وچ بتیس سال پہلاں میں صحافت دے شعبے وچ پنجابی دی چاہت کارن آیا، جدوں میں سجن اخبار وچ اک اردو بولن والے حسین نقی توں صحافت سکھی، اج وی میری طلب گھٹ نئیں ہوئی۔ ایسے کارن میں کدے کدے بڑے ٹھیٹ لفظ وی بول جاندا آں۔
اج ریلی وچ ساڈے میڈیا دے اکثر سیانے ایہہ کہندے پائے گئے کہ ایتھے پنجابی دے نعرے لاون والے بوہتے اوہ لوگ نیں جنہاں دے بال انگریزی میڈیم سکولوں وچ پڑھدے تے گھراں وچ اردو بولدے نیں۔
میرا کہنا سی پئی زبان لئی ایہہ خواہش ای کہ سانوں ماں بولی بولنی چاہی دی اے، وڈی گل اے، ساڈے وچ ایہہ خواہش وی مردی جاندی۔ یونسیف دی ایک ریسرچ مطابق دنیا وچ ختم ہوون والی مرن والی مادری زباناں وچ پنجاب اتلے نمبراں اتے وے۔
اج اک وار فیر ایہہ خوشی ہوئی پئی نویں نسل دے نمائندے وی اپنی ماں بولی دی کھوج وچ آئے سن۔ ایس نوں سوشل میڈیا دا بخار کہہ لوو، یاں اوہناں دی اپنی خواہش ۔ لیکن اصل گل ایہوں ای اے پئی زبان تیزی نال مررہی اے۔ کیوں جے ناں اسیں پنجابی پڑھ دے آں ناں لکھ دے رہی سہی کسر بولن توں وی جھکدے آں۔ جنہاں زباناں دی چادر اپنے اتے چڑھائی اے، اوہناں توں وی چنگی طرحاں آشنائی نئیں ہو پاندی،
دوجیاں زباناں دی جانکاری اوہناں نوں بولن وچ کوئی روک یا برائی نئیں، لیکن اپنی شناخت بھل جاون دا شوق سانوں ہورے کدھرے دا کدھر لے جارہیا اے۔ اج اسیں اپنے شوق دی تسکین لئی پنجابی فلماں بڑے چا نال ویکھدے آں۔ اردو لکھدیاں پنجابی دے لفظاں دا تڑکاں مزے تے ریٹنگ لین لئی لاندے آں۔ ایتھوں تیک کہ اردو بولن والے اہل زبان وی پنجابی دا سہارا لیندے نیں۔
مینوں تے فیشن خاطر پنجابی بولن والے بھی بڑے بھلے لگدے نیں، ایہدے وچ کوئی ہرج نئیں۔ اپنی پہچان توں فرار سانوں کجھ نئیں دیوے گا۔ ساڈے ہتھ کجھ نئیں آوے گا۔ سانوں نکی جئی مشقت کرنی ہووے گی، اپنے بالاں نوں خاص کر اپنی گھروالیاں نال ماں بولی ضرور بولنی چاہیدی اے اوہ پنجابی ہووے، سرائیکی ہووے یاں کوئی دوجی زبان۔ ایس دا مقصد اردو یا انگریزی دی مخالفت نئیں۔ صرف اپنے آپ نوں پہچاننا اے۔
مینوں ایس گل دا وی دکھ ہوندا اے ساڈے پڑھے لکھے دوست گل نظریات دی کردے نیں مگر انساناں نال خود نوں نئیں جوڑدے۔ محض مخالفت اور اختلاف کارن دوجے نال نفرت کرن لگدے نیں۔ اوہناں نوں اپنے توں دور کرلیندے نیں۔ زبان یا نظریہ کدے وی کسے نوں وکھ کرن دی گل نئیں کردا۔ مذہب دا نام لین والے مسلک فرقہ جماعت دی کندھ کھڑی کرن والے وی شاید ایہوں کجھ کردے نیں۔ مخالف نوں دور کردیندے نیں۔ اپنی سوچ تے خیال اکو جیہے رکھن والے نال محبت تے دوجے نال نفرت کردے نیں۔ سانوں زبان دی بنیاد اتے وی دوجیاں زباں خاص کر اردو بولن والیاں نال ویر نئیں رکھنا۔ تے انج ای پنجابی بولن والے کوئی بھیڑے لوک نئیں ہوندے، پینڈو ہونا وی کوئی بُری گل نئیں۔
سوال اکو ای اے، اسیں سبھ کجھ سکھ دے آں، آخر ماں بولی کیوں نئیں ۔
About Post Author
