کبڈی ورلڈکپ: پاکستان بھارت ہرا کے چیمپئن بن گیا

لہور دی پنجاب سٹیڈیم وچ کبڈی ورلڈکپ دا فائنل روایتی حریفاں وچکار ہویا، دوہاں پاسے دے پہلواناں چنگا تے دل کھچواں کھیڈ وکھایا، دوہاں ہاف وچ ٹیماں پوائنٹس ٹیبل اتے اک دوجے توں اگے ودھن دا آہر کردیاں رہیاں۔
کئی موقعیاں اتے بھارتی ٹیم تے انتظامیہ ولوں امپائراں دے فیصلیاں اتے جان بوجھ کے احتجاج وی کیتا گیا جیہڑا کارگر ثابت نہ ہویا۔
دوسرے ہاف دے اخیر اتے پاکستان نے بھارتی ٹیم نوں 41 دے مقابلے 43 پوائنٹاں نال شکست دے کے پہلی واری کبڈی ورلڈکپ دا ٹائٹل اپنے نام کرلیا۔
بھارتی ٹیم کبڈی ورلڈ کپ سرکل اسٹائل دے ٹائٹل دا دفاع کرن وچ ناکام رہی، بھارتی ٹیم 6 واری ورلڈکپ جت چکی اے ایہہ اوس دی پہلی شکست اے۔
گورنر پنجاب محمد سرور فائنل دے اچیچے پروھنے سن، جنہاں جتن والی پاکستانی ٹیم نوں ٹرافی تے اک کروڑ روپے دی انعامی رقم دتی، بھارتی ٹیم نوں 75 لاکھ روپے انعامی رقم دتی گئی۔
ٹورنامنٹ وچ تیجی پوزیشن ایران نے حاصل کیتی تے آسٹریلیا نوں 33 دے مقابلے 54 پوائنٹاں نال شکست دتی۔