امریکی تے جرمن خفیہ اداریاں ولوں کوڈنگ مشیناں راہیں کئی ورھیاں تیک پاکستان ، ایران تے بھارت سنے 120 ملکاں دی خفیہ معلومات چران دا انکشاف ہویا اے۔
ایہہ انکشاف امریکی اخبار واشنگٹن پوسٹ، جرمن نشریاتی ادارے زیڈ ڈی ایف تے سوئس چینل ایس آر ایف دی اک سانجھی تحقیقاتی رپورٹ وچ کیتا گیا اے۔
رپورٹ مطابق خفیہ پیغام گھلن لئی کوڈنگ مشیناں بناون والی سوئٹزر لینڈ دی معروف کمپنی ’کرپٹو اے جی‘ اصل وچ امریکی خفیہ ایجنسی سی آئی اے دی ملکیت سی تے سی آئی اے نے اوہدوں دے مغربی جرمنی دی انٹیلی جنس ایجنسی بی این ڈی نال وی اپنی سانجھ بنارکھی سی۔
سوئس کمپنی کرپٹو اے جی نے دوجے وڈی جنگ توں لے کے سن 2000ء تیک 120 ممالک نوں کوڈنگ ڈیوائس دتے جنہاں نوں اینہاں ملکاں دے جاسوس، فوجی تے سفارت کار خفیہ سنہیے گھلن لئی ورتدے رہے۔
رپورٹ وچ دسیا کہ سی آئی اے تے بی این ڈی نے اینہاں مشیناں وچ خفیہ پیغام چوری کرن دا نظام قائم کررکھیا سی تے جیویں ای کسے ملک توں پیغام ٹردا اوہ امریکی تے جرمن خفیہ اداریاں نوں وی ڈی کوڈ ہوکے مل جاندا سی۔
396
