کھڈاری، امپائر تے غریباں دا نشہ

خاکی چنگے نیں یا عوامی، لوکائی نوں کجھ پتہ نئیں ، جمہوریت، آزادی، حقاں دی گل سن سن کن پک گئے، سیاست دا گنجھلک کھیڈ کھیڈن والے اج وی میدان وچ وڈی دلیری نال اتر دے نیں۔ کسے نوں اپنے امپائر یا گاڈ فادر ہوون اتے مان اے، کوئی ماہر کھڈاری بن کے تماشبین لوکائی دا دل خوش کردا اے۔ اک نعرہ تے اک وڈی گل لوکاں نوں پچھے لا لیندی اے۔ سیاست نام ای ایس مہارت دا اے۔
لوکاں نوں چنگا کھیڈ وکھاون نال رجھ کے واہ واہ کٹھی کرلین والا وڈا کھڈاری بن جاندا اے۔ گل اوتھے جاکے وگڑدی اے جدوں اپنی من مرضی اتے آجاندا۔ کیوں جے میدان وچ کھڈاری دے کھلون دا فیصلہ تاں امپائر کرنا ہوندا اے۔ اوس نوں چنگا ناں لگے تاں انگل کھڑی کردیندا اے۔ اوہدی انگل اٹھن نوں تیار ہوندی اے۔
امپائر دا دل کرے تاں اپنے ہتھوں باہر کڈے کھڈاری نوں وی مڑ میدان وچ لے آوے۔ اوس نوں اپنے سارے کھڈاری عزیز ہوندے نیں۔ بس کھڈاری ضد کرن لگ پین تاں فیر اوہ بُرا منالیندا اے۔ کھڈاری نوں سبق سکھان تے ایہہ دسن لئی پئی میدان دا اصل کنٹرول اوہدے ہتھ اے، اوہ کجھ ناں کجھ کردا رہندا اے۔ ایس دے نال ای امپائر نے تماشبیناں نوں ایہہ وی دسنا ہوندا اے پئی اوہ ایس کھیڈ دا مرکزی کردار اے اوہدے بغیر ایہہ کھیڈ کھیڈن دا سوچنا وی نئیں۔
ایتھے ای کجھ اجیہی سوچ رکھن والے کھڈاری وی ہوندے نیں جنہاں نوں بھرویں کھیڈ دا موقعا نئیں ملدا دوجے پاسے اوہ اصول تے حق دے پکے ہوندے نیں، اوہناں دی گلاں کدے کدے چنگیاں تے کدے کوڑیاں لگدیاں نیں۔ اوہناں سچ دا ساتھ دینا ہوندا اے، ایہہ کھڈاری گھٹ دے جارہے نیں، کیوں جے امپائر نے کجھ اجیہا اصول بنادتا پئی چنگے بھلے اصولی کھڈاری وی اوہدی گل سنے تے منے بغیر نئیں رہندے۔
تماشبین وی ہن ایس کھیڈ توں اکتا گئے نیں، اوہناں نوں جانکاری اے پئی سبھ امپائر دی کیتی اے، فیر وی اوہ اپنے من چاہندے کھڈاریاں توں آس لالیندے نیں پئی اوہ کجھ چنگا کر وکھاون گے۔ اوہناں ایہہ دھڑکا لگیا رہندا اے کہ امپائر کھڈاری نوں کنی دیر تائیں کھیڈن دیندا اے۔ دوجے پاسے کجھ کھڈاری تے امپائر نال ای چمڑے رہندے نیں، واری کسے دا وی ہووے، امپائر اوہناں نوں ہر ٹیم وچ فٹ کردیندا اے، تماشائیاں نوں وی بھل جاندا اے پئی پچھلی واری ایہہ کسے ہور ٹیم وچ سی، ہن نویں ٹیم نال وی کھیڈ رچاون آوڑیا اے۔
کھیڈ،کھڈاری تے امپائر سبھاں دا معیار تے کارکردگی ہر آوندے دیہاڑے بھیڑی ہوندی جارہی اے، لوکیں فیر وی کسے چنگے کھیڈ دی اڈیک وچ من کھچویں نعرے تے گلاں سن لیندے نیں، اوہناں ہن ایس نورا کشتی نوں ای اصلی جان لیا اے۔ ایسے دے نشے وچ مزے لیندے نیں۔ اوہ نمانیں ہور کجھ کر نئیں سکدے۔ اپنا حال تیک کسے نوں دسن جوگے نئیں رہے، وڈے کھیڈ دی وڈی گلاں پر ماڑے تماشبین نوں تاں دو وقت دی روٹی دا فکر اے۔ اوس نوں جیہڑی چنگی گل کردیو اوہ کیہڑا انکاری اے۔ اوس دے فرشتے وی نئیں جان دے پئی امپائر دے دل وچ کیہ چل رہیا اے۔
ہن اگلا کھڈاری کون اے، چمڑے کھڈاری ہن کدے موڈھیاں اتے بیٹھن دی تیاری کررہے نیں۔ اک نویں اڈیک شروع ہوگئی، تماشائیاں بس ایس اڈیک دا چس لینا اوہ ہور کجھ نئیں کرسکدے، ہن نشہ جیہا ہوگیا اے، کیہ کرن غریباں نوں ایس توں ودھیا تے سستا نشہ ہور نئیں مل سکدا۔