نیشنل ٹی20 کپ دے فائنل وچ ناردرن دی ٹیم نے بلوچستان نوں اسانی نال 52 رنز توں ھرا کے چیمپیئن بنن دا مقام حاصل کر لیا۔
فیصل آباد دے اقبال اسٹیڈیم وچ کھیڈے گئے ایونٹ دے فائنل وچ بلوچستان دی ٹیم نے ٹاس جت کے پھلاں باؤلنگ دا فیصلا کیتا جو غلط ثابت ہویا۔عمر امین نے 38 گینداں اتے 3 چھکیاں تے 6 چوکیاں دی مدد نال 60 رنز دی اننگز کھیڈ کے اپنی ٹیم نوں چنگی تھاں اتے اپڑا دتا۔اس توں اڈ محمد نواز نے 31 تے شاداب خان نے 25 رنز دی اننگز کھیڈی جس پاروں ناردرن نے 5 وکٹاں دے نقصان اتے 167رنز بنائے۔
بلوچستان دی ٹیم شروع وچ ای مشکلاں دے ھتھے چڑہ گئی تے سہیل تنویر نے کپتان امام الحق اے بسم اللہ خان نوں 14 رنز اتے چلتا کیتا اس توں مگروں اویس ضیا تے عمران فرحت نے 44 رنز جوڑ کے اسکورنوں 58 تائیں اپڑا دتا پر اس توں بعد کوئی وی بلے باز ٹک کے ناردرن دے باؤلرز دا ساھمنا نہ کر سکیا۔پورے ٹورنامنٹ وچ بلوچستان دی ٹیم نوں اوکڑاں وچوں کڈھن والے عماد بٹ وی اس واری ٹیم دے کم نہ آ سکے تے نرے 13 رنز بنا کے آؤٹ ہو گئے۔بلوچستان دی پوری ٹیم نرے 115 رنز اتے ڈھیر ہو گئی تے ناردرن میچ 52 رنز توں جت کے چیمپیئن بن گیا۔عمر امین نوں چنگی بیٹنگ کرن دی وجا توں میچ دا ودھیا کھڈاری متھیا گیا۔
379
