نوازشریف دی رہائی تے باہر گھلن دا امکان

سابق وزیراعظم نوازشریف دا لہور دے سروسز ہسپتال وچ علاج چل رہیا اے، جتھے اوہناں دے مختلف میڈیکل ٹیسٹ کیتے جارہے نیں، ایس توں اڈ رپورٹاں برطانیہ گھلیاں گئیاں نیں، جنہاں دی مڈھلی رپورٹاں وچ ڈاکٹراں اوہناں دے ملک توں باہر علاج دی صلاح دتی اے،

دوجے پاسے وزیراعظم عمران خان نے گورنر پنجاب نوں فون کرکے اوہناں توں نوازشریف دی صحت بارے پچھیا تے ہدایت کیتی پئی اوہناں دی بیٹی مریم نوں کوٹ لکھپت جیل توں اپنے والد دی تیمارداری کرن خاطر ہسپتال نال رکھیا جائے، ایس اجازت مگروں پنجاب دی حکومت نے نیب نال مل کے سارے قنونی تقاضے پورے کرلئے تے مریم نواز نوں جیل توں اک وار فیر ہسپتال گھل دتا۔
شہباز شریف نے عدالت وچ درخاست دتی اے جیہدے وچ کہیا گیا اے کہ وگڑی صحت پاروں نوازشریف دی سزا معطل کرکے اوہناں نوں ضمانت اتے رہائی دتی جاوے تاں جے لیگی رہنما دا علاج کرایا جاسکے، قنونی ماہراں دی رائے مطابق اج عدالت توں اوہناں نوں ضمانت ملن دا امکان اے۔
اجیہی اطلاعاواں نیں پئی اوہناں نوں علاج دی غرض نال ملک توں باہر گھل دتا جاوے ایس دے نال سرکار مریم نواز نوں وی نال باہر جاون دی اجازت دے سکدی اے۔