عبدالقادر وی سبھ نوں دکھی کرگئے

کرکٹ دی تریخ لکھن والا شاید لہور دے ایس سوہنے تے ہیرو سٹائل والے کھڈاری دا ذکر کیتے بنا نئیں رہ سکے گا، جنہیں لیگ سپن بولنگ وچ ایسا جادو جگایا کہ گورے وی اوس دی فلماں بناکے ویکھن اتے مجبور ہوگئے۔

عبدالقادر نے گراونڈ وچ پیر رکھ دے سار ای ایہہ پک کرلیا سی کہ اوس کرکٹ دی دنیا وچ اپنا نام بنانا اے۔ فیر پوری دنیا دی نگاہاں ویکھیا کیویں اوس انگلیاں دا جادو جگایا۔ سامنے کھلوتے بلے بازاں نوں نہ صرف پریشان کیتا سگوں اپنے نال ناچ نچایا۔ عبدالقادر نوں ڈانسنگ بولر دا خطاب وی ملیا۔ کرکٹ شوقیناں نوں ہالے وی اوہناں دا من موہنا انداز یاد اے۔
ایہہ ہسدا بولر جنہوں کرکٹ توں ہٹ کے کدے کوئی گل کردیاں نئیں ویکھیا، عمران خان نے اوہناں نوں توں میدان وچ لیاندا، اوس دی یاری خاطر سیاست وچ پیر رکھے۔

عبدالقادر اخیرلے ویلے تائیں کرکٹ دی گل کردے رہے،
63 ورھے دی عمر وچ دنیا توں ٹرگئے۔ وزیراعظم عمران خان نے آکھیا کہ میرا دل دکھی اے، میں اج اک چنگے دوست تے وڈے کھڈاری توں محروم ہوگیا۔ رب اوہناں دی بخشش فرمائے۔

آرمی چیف جنرل قمر جاوید باجوہ افسوس کردیاں آکھیا کہ پاکستان اک عظیم کھڈاری تے انسان کھودتا۔
پی سی بی نے ٹویٹ پیغام وچ آکھیا کہ بورڈ عظیم کرکٹر دی وفات اتے غمزدہ اے۔
عظیم کرکٹر سچن ٹندولکر نے ایس اطلاع اتے دکھی ہوندے لکھیا کہ عبدالقادر اپنے ویلے دے عظیم بولرسن۔
سنجے منجریکر آکھیا عبدالقادر سپن بولنگ نوں نویں راہ وکھائی۔
وسیم اکرم لکھ دے نیں، عبدالقادر جادو گر سن، اوہناں مینوں ویکھ دیاں آکھیا سی توں آوندے 20 ورھیاں تیک پاکستان لئی کھیڈیں گا، مینوں ایس گل اتے یقین آگیا۔ اسیں عبدالقادر نوں کدے بھلا نئیں سکاں گے۔
کپتان سرفراز احمد نے عظیم کھڈاری دی وفات دی خبر نوں افسوس والی آکھیا اے۔
صدر عارف علوی، سپیکر اسد قیصر، وفاقی وزیراں ، سابق کرکٹراں، قومی ٹیم دے سبھے کھڈاریاں فن کاراں تے سماج دے دوجے شعبے نال تعلق رکھن والیاں وی ڈاھڈے دکھ دا اظہار کیتا اے۔