لکھاری، امجد سلیم منہاس
کشمیر مسئلے تے سیاسی فلسفے دی روشنی ہیٹھ بحث جاری اے۔ پر ایہہ اک انسانی
حقوق دا وی مسئلہ اے، سیاسی تے انسانی حقاں دی گل خودارادیت دے حق توں بغیر مکمل نئیں ہو سکدی،ایس لئی جیہڑے دوست پنجابی بولی دے حق دی گل کرن والے تے ترقی پسند دوستاں نوں کشمیر مسئلے تے گل کرن اتےطعنے دے رہے نیں تے اوہ ایس مسئلے دے کھلار نوں گھٹ کرکے ویکھ رہے نیں۔
پنجابی تے سوشلسٹ بالکل کشمیر مسئلے نوں انج نہیں چک رہے جیویں ساڈے جرنیلی ٹولے نے چکیا تے اوہدے پٹھو حافظ سعید تے دفاع پاکستان کونسل۔ والے پیسے لے کے جہادی علم چکدے رہے نیں تے ہن چونکہ لبھت نہیں رہی تے کتھوں دا جہاد تے کتھوں دی آزادی؟ایہہ لبھت ساڈی ڈیپ سٹیٹ مکاونی نہیں سی چاہندی، دنیا نوں چلاون والیاں نے سنگی اتے ناہوں رکھ کے مکائی اے جیہدے پاروں ہر قسم دا جہادی غلغلہ ٹھپ ہو چکیا اے۔
ہن آو جیہڑے نویں نویں ہندو “جہادی ” جمے نیں، ایہہ وی اپنی موتے مرن نہ مرن دنیا نوں چلاون والے ہی ایہناں دا مکھو ٹھپن گے۔ سرمایہ دار دنیا نوں ختم نہیں اوہنوں نچوڑنا چاہندا اے تے ایس خطے وچ نچوڑن نوں بوہت کجھ اے۔ ہندتوا تے جہاد والے اوہناں دے ٹٹو نیں۔ایناں دونواں نال اپنے اپنے ملکاں وچ امن تے جمھوریت پسند قوتاں لڑ رہیاں نیں۔
ایس ویلے کشمیر دی تحریک آزادی حقیقی معنیاں وچ مقامی کشمیری جدوجہد بن چکی اے۔ساڈی اسٹیبلشمنٹ دا “جمھوری” چہرہ تے خوف نال کہندا اے کہ میں ہندوستان تے حملہ کر دیاں؟ چیتے رہوے کہ ایہہ اوہ اسٹیبلشمنٹ اے جیہڑی کل تک وی دفاع پاکستان کونسل والیاں نوں پیسے دے کے جہاد کرواندی رہی سی تے اسیں ایہدی مخالفت کردے ساں تے اپنے سینے تے ” غداری ” تے تمغے سجاندے ساں۔اج جگت پنڈ دے دور وچ جیہڑے وی بندے کشمیریاں تے ہوون والے ظلم تے اوہناں دے حق خودارادیت دی حمایت نہیں کرن گے اوہ جمہوری تے انسانی حقوق دے تصورات توں مونہہ موڑن گے۔
کل انجمن ترقی پسند مصنفین دا کشمیر مسئلے اتے ہوون والا اجلاس اپنے تریخی سیاسی تے انسانی حقاں لئی کیتی جاون والی جدوجہد دا تسلسل سی۔
