بھارت نال وپار معطل، سفیر نوں ملک چھڈن دا حکم

پاکستان نے بھارت ولوں مقبوضہ کشمیر دی خصوصی حیثیت نوں مکاون مگروں قومی سلامتی کمیٹی (این ایس سی) دے اچیچا اکٹھ وچ بھارت نال دوپاسی وپار نوں معطل کرن تے سفارتی تعلقات نوں محدود کرن دا فیصلہ کرلیا اے۔
اعلامیے مطابق بھارتی سرکار ولوں کیتے گئے غیرقنونی فیصلے مگروں وگڑدی صورت حال ا مقبوضہ جموں تے کشمیر دی اندرونی تے لائن آف کنٹرول (ایل او سی) حالات دا جائزہ لیا گیا۔
اجلاس وچ فیصلہ کا گیا کہ بھارت دے نال دوپاسی تجارت نوں معطل کیتا جاوے گا۔
قومی سلامتی کونسل فیصلہ کیتا کہ بھارت نال سفارتی تعلقاں نوں محدود کر دیا جاوے گا۔
ایہہ وی فیصلہ کیتا کہ پاک-بھارت تعلقات اتے مڑ توں غورکیتا جاوے گا۔
فیصلہ مطابق مقبوضہ جموں تے کشمیر دی خصوصی حیثیت منسوخ کرن دے بھارتی غیر قنونی اقدام سلامتی کونسل سنے اقوام متحدہ سامنے چکیا جاوے گا۔
قومی سیاسی تے عسکری قیادت فیصلہ کیتا کہ یوم آزادی نوں کشمیری لوکائی نال ایکے دے طور اتے منایا جاوے گا، مسئلہ کشمیر نوں بھرویں طور اتے چکیا جاوے گا، بھارت دے آزادی دیہاڑ 15 اگست نوں سیاہ دیہاڑ دے طور اتے منایا جاوے گا۔
قومی سلامتی اجلاس فیصلہ کیتاکہ دوپاسی تعلقاں بارے بندوبستاں دا ویروا کیتا جاوے گا۔
پاکستان نے بھارتی ہائی کمشنرنوں ملک چھڈن دا حکم دے دتا، نالے نویں دلی وچ اپنے ہائی کمشنر نوں وی واپس نئی گھلیا، اوہ اینہاں دناں پاکستان آئے نیں۔ ایس توں اڈ ڈپٹی ہائی کمشنر نوں خارجہ دفتر طلبی کرکے اوس توں بھارتی کارروائیاں اتے بھرواں احتجاج کیتا۔