کتاب فروشی دی تجارت
سکھاں دے ویلے چھاپے دی کوئی کتاب ہندوستان توں پنجاب نئیں آوندی سی، قلمی کتاباں کاتب لوکیں لکھ کے ویچدے سن۔ شہر دے وچ وزیر خان دی مسیت دے لاگے دکاندار کتاباں دا کاروبار کردے سن۔ ایتھے جلد بندی دا کم وی ہوندا۔ کتاب فروشی دا وڈا کارخانہ میاں محمد بخش صحاف دا سی۔ جیہدے کول 25 توں ودھ کاتب ملازم سن جیہڑے کتاباں لکھ دے سن۔ اوہدے کارخانے کی کتاباں پورے پنجاب وچ جاندیاں ایس دے نال ایران تے خراسان تیک دے سوداگر ایتھوں خرید کے لے جاندے سن۔ ہن اوہ کارخانہ ختم ہوگیا، محمد بخش صحاف دا پتر مولوی فضل الدین سرکاری ڈائریکٹری پریس وچ سپرنٹنڈنٹ دے عہدے اتے ملازم ہوگیا سی۔ شہر وچ کتاباں دا وڈا تاجر چراغ الدین ای رہ گیا سی۔ جیہدی دکان وچ ہزاراں روپے دی کتاباں دی تجارت ہوندی۔ اوہ ہر مہینے لکھنو توں وی کتاباں منگواندا۔ اوس دا اپنا پریس وی سی، جتھے کتاباں چھپ دیاں سن۔ جیہدا ناں وکٹوریا پریس سی۔ فقیراللہ دی دکان وچ دینی کتاباں ملدیاں نیں، جتھے مسلماناں دا رش لگیا ہوندا اے۔ الہی بخش وی کتاب فروشاں وچ وڈا نام اے ایہہ تنوں کتاب فروش شہر وچ مشہور نیں۔ اینہاں دی کتاباں پشاور،ملتان، ڈیرہ غازی خان، ڈیرہ اسماعیل خان، دور دے علاقیاں تیک جاندیاں۔ ایس توں علاوہ کریم بخش، ملک ہیرا تے محی الدین گلاب سنگھ وی کتاباں دی تجارت کردے سن۔ چنگی تے معتبر کتاباں لہور وچ گھٹ چھپ دیاں سن، ایہہ لکھنو دہلی تے بمبئی توں لیا کے ویچی جاندیاں نیں۔
