بھاویں کتے پے جاون ٹنگاں نوں

رب رب کردیاں آئی ایم ایف سواتن ورھیاں لئی کڑی شرطاں دی پوٹلی وچ بنھ کے چھ ارب ڈالر قرضہ تن جولائی نوں منظور کیتا ای سی کہ ٹھیک یاراں دیہاڑمگروں سرمایہ کاری بارے عالمی بینک دے اک ثالثی ٹریبونل نے ریکوڈک تانبے دے ذخیرے دے پٹے دے جھگڑے دافیصلہ پاکستان دے خلاف دے دتا۔
ایس فیصلے تحت ہن پاکستان نوں آسٹریلیا دی معدنیاتی کمپنی ٹیتھان نوں 5.9 ارب ڈالر ہرجانہ دینا پئے گا۔ دوجی صورت وچ ریکوڈک دے معدنی حق ٹیتھان کمپنی نوں رہن رکھوانے پے جاون گے۔
ٹیتھان نوں لیز دیوں نال سرکار بلوچستان نے بغیر کوئی معقول کارن دسیاں نومبر 2011 وچ انکار کردتا۔
اوس ویلے تیک ریکوڈک دے سروے،فیزیبلٹی دوجے خرچیاں دی مد وچ ٹیتھان کمپنی 22 کروڑ ڈالر خرچ کر چکی سی، ایس پاروں کمپنی نے عالمی بینک دے ثالثی نظام توں رابطہ کیتا۔ ٹریبونل نے ست ورھے تیک سنوائی مگروں پاکستان نوں چھ ارب ڈالرداچالان تھما دتا۔
ریکوڈک وچ چھ ارب ٹن کچے تانبے تےچھ لاکھ ٹن سونے دے ذخیرے موجود ہوون دا ٹیوا لایا گیا سی، جدھا مطلب سی پاکستان وچ سونے دا پنجواں وڈا ذخیرہ ایتھے اے۔
موجودہ سرکار تن مہینے پہلاں تیک کراچی دے لاگے سمندر وچ تیل تے گیس دے اک بوہت وڈے گیم چینجر ذخیرے دی دریافت دی آس لائے بیٹھی سی۔ مگر ریکوڈک داثابت شدہ معدنی ذخیرہ وی اوہدے ہتھوں پھسل گیا۔
سرکار نے ریکوڈک دے ہرجانے دی ذمہ داری دا جائزہ لین لئی اک کمیشن بناون دا اعلان کردتا اے۔مگر جیہڑا کہندے نیں ،ہن پچھتاوت کیا ہوت جب چڑیاں چک گئیں کھیت ،ایہہ آکھان مشہور اے، مردے دے وال مونڑ نال اوس دا وزن نئیں گھٹ دا ، ایہہ وی آکھیا جاندا اے کہ لڑائی مگروں یاد آون والا مکا اپنے ای مونہہ اتے ماردینا چاہیدا ۔
تے جدوں کمہیار اتے وس نہ چلے تاں کھوتے دے ای کھچے جاسکدے نیں۔ یعنی کوئی اسمبلی وچ سلیکٹڈ نہ کہہ دے، نواز شریف نوں جیل داکھانا دتا جاوے یا گھر دا، جنہاں اتے کرپشن دےمقدمے نیں اوہناں نوں ٹی وی کوریج ملنی چاہیدی اے یاں نئیں، تن ٹی وی چینلاں دی نشریات پیمرا نے معطل کرائیاں یا پیمرا نوں لولے لنگڑے بناون والے فرشتیاں ۔
جسٹس قاضی فائزعیسیٰ اتےبےنامی جائیداد دا ریفرنس ٹھیک اے یاں غلط، احتسابی جج ارشدملک دی وڈیو اتے یقین کیتا جاوے کہ بیان حلفی اتے، خواجہ آصف بطور وزیر دفاع تے وزیرِ خارجہ کنے قیمتی راز کسے بیرونی ایجنٹ حوالے کیتے ایس دی پرچول دی لوڑ پئے گی۔
20 جولائی نوں سابق فاٹا وچ اسمبلی انتخابات ہو رہے نیں۔ دفعہ 144 دے باوجود کوئی وی’ملک دشمن امیدوار‘ جیتن نہ پائے۔( ملک دشمن امیدوار اوس نوں کہندے نیں جیہدا تعلق یا ہمدردی پختون تحفظ موومنٹ نال ہووے)۔
رانا ثنا اللہ اپنی ہیروئن سمگل کر رہے سن یا دوجیاں دی؟ کوئی این آر او منگے یا نہ منگے دوناں دی خیر نئیں۔ جیویں 50 ورھے پہلاں دے پاکستان وچ نہ کمیونسٹ دی خیر سی ناں اینٹی کمیونسٹ دی۔ مفرور سابق وزیرخزانہ اسحاق ڈار نوں گرفتار کر کے ضرور پاکستان لیایا جائے گا مگر پرویز مشرف نامی مفرور؟
بھلے چھ ارب ڈالر آئی ایم ایف توں آجاون تے دوجے ہتھ توں ریکوڈک دے ہرجانے وچ لٹ جاون، مگر گیس، بجلی، تیل، چینی، آٹے اتے سبسڈی اک بھاری بوجھ اے تے ایس بوجھ دا ایہہ ملک ہن بھار نئیں چک سکدا اے۔
ٹریناں دے حادثے توں ریکوڈک ہرجانے تیک سب دی ذمہ دار وہ دو سابق سویلین حکومتاں نیں،جیہڑی 2008 توں پہلے وگن والی ددھ تے شہد دی نہراں بغیر ڈکار لیتے پی گئیاں۔ ایس پاروں کسے کرپٹ نوں نئیں چھڈاں گے(کرپٹ توں مراد ہر اجیہے بندے توں اے جیہڑا اپوزیشن نال تعلق رکھ دا ہووے)۔
ریکوڈک دا فیصلہ تاں آگیا۔ کلبھوشن یادو بارے عالمی عدالت انصاف دا فیصلہ دی آون والا اے،حق وچ آیاتاں سرکار دی واہ واہ،خلاف آیا تاں لنگھی سرکاراں دے نام اتے دھاڑدھاڑ۔
نکے ہوندے محاورہ سنیا سی، کیہ پرواہ ملنگا نوں، بھاویں کتے پے جاون ٹنگاں نوں، ایہدا اک مطلب ایہہ وی اے ’گھبرانا نئیں اے‘۔