محمدحنیف
اگر ایہہ سوچ کے پریشان او کہ اسلامی جمہوریہ پاکستان دے جج تہاڈی سالگرہ اتے کیوں خوش نیں، مبارک کیوں دے رہے نیں تاں میاں گل اے وے کہ ساڈے بھائی ججاں نال تہاڈے کجھ دیہاڑ لنگھے نیں، ایہہ وکھری گل اے کہ اوہ منصف دی کرسی اتے سن تے تسیں ملزماں دے کٹہرے وچ۔
فیر تہاڈے خلاف فیصلہ دیوں توں پہلاں تے اک ادھ وار بری کرن توں پہلاں اپنے چیمبر وچ بیٹھ کے تہاڈی گندی کہانیاں دے مزے وی لتے نیں۔ کناں نوں ہتھ لاکے اللہ توں معافی وی منگی اے تاں فیر اینہاں حق تے بن دا اے کہ ہیپی برتھ ڈے بول دیواں۔
ویسے تینوں ایہہ وی دسنا سی کہ ساڈی ساری کوششاں دے باوجود تہاڈی کتاباں ماشااللہ خوب چھپ رہیاں نیں تے وک وی رہیاں نیں۔ پتہ نئیں تہاڈے خاندان والیاں نوں رائلٹی ملدی اے یا نئیں لیکن جنہوں وی ویکھو منٹو چھاپ رہیا اے۔ ہن دی گل اے میں اک کتاباں دی دکان اتے تہاڈے اک بھرویں نسخے کتاب نوں ویکھ رہیا ساں۔ چک کے کجھ ورقے پڑھے رب جان دا ایس ماڑے جئے جُسے وچ جیویں سنسنی دوڑ پئی ہووے، جیویں سٹھ ورھیاں پہلاں اپنے چیمبر وچ دوڑی سی۔
فیر دل وچ کجھ ہول اٹھن لگ پیئے، کتاب بند کیتی مُل اتے نگاہ پئی۔ 750 روپے۔ مبارک ہووے منٹو میاں ہن ایہہ حساب لاون نہ بیٹھ جانا 750 روپیاں وچ تسیں شراب دے کنے ادھے خرید سکدے او۔ میاں اج گل پین نال دل گردہ وہ ہونا چاہیدا اے۔ پہلاں اپ نوں شریف شہری ثابت کرنا پیندا اے۔ ہاں لکھاریاں تے صحافیاں نوں اج کل ادبی میلیاں اتے بلاکے خوب پلائی جاندی اے۔ جے انگریزی وچ لکھدے او تے ایسی ایسی ملدی اے کہ تسیں ممی دے کوٹھے اتے وی نئیں ویکھی ہووے گی۔ لیکن تنوں کوئی کیوں بلائے گا کیوں جے توں تے پین توں پہلاں ای ادبی میلیاں دے بندوبستیاں تے اوہناں دے سپانسراں دے ماں پیو دی دھی بھین اک کرن لگو گے جیویں ساڈے معزز جج بھائیاں دی شان وچ کردے سو۔
منٹو میاں تسیں اپنے قلم توں عرق کڈھ کے پیندے تے فیر ایس بارے لکھدے سو، بھرے مجمعے وچ گل کرن دی وی عادت سی۔ اج کل جیہڑے پیندے نیں اوہ ایس بارے گل وی نئیں کردے جیہڑے نئیں پیندے اوہ جھوم جھوم کے وعظ تقریراں کردے نیں۔
میاں سچی گل تاں ایہہ وے کہ ادبی دنیا وچ تہاڈی بے ادبیاں ای تہانوں لے ڈوبیاں ۔ جس محفل وچ لوکیں جام توں آسرا لیندے سن تسیں اوتھے اپنا ٹھرا کھول کے بیٹھ جاندے سو۔
تہاڈے بھتیجے دی دھی تے تہاڈے وانگ دلیر تاریخ دان عائشہ جلال نے پرچول وچ ثابت کیتا اے کہ پاکستان آون توں پہلاں تسیں نری شراب ای پیندے سو، پاکستان آکے تسیں باقاعدہ شرابی بن گئے۔ یعنی پاکستان تہانوں اک مکمل شرابی بنا دتا۔
یاد اے جد اوپر تھلے تے درمیان والا مقدمہ بھگتن لئی کراچی آئے سو تے راہ وچ کھان پین لئی بیئر دی دس بوتلاں سن۔ میاں جے اج لکھ رہے ہوندے تاں اوپر نیچے اور درمیان تے معافی ہوجاندی لیکن دس بیئر پین دی پتہ نئیں کنی سزا اے؟ جے اسلامی جمہوریہ پاکستان دے چیف جسٹس نوں خبر ہوجاندی تاں اک ادھے اتے وی ایسا ٹنگدے کہ ساری حیاتی تریخاں بھگت دے رہندے۔
کیہ آکھیا صرف اک ادھے اتے؟
جے میری گل اتے یقین نئیں آندا تے عتیقہ اوڈھو نوں پچھ لو
ایہہ عتیقہ اوڈھو کون اے؟
ہن پچھو گے کہ چیف جسٹس کون اے تے کیہ چاہندا اے تے فیر کوئی کہانی جوڑن بیٹھ جاو گے۔ منٹو میاں تہاڈے نال تے خیالی گلاں کردے کردے وی پنشن خطرے وچ پے جاندی اے۔ ہن تہاڈے ادھے یا بیئر دی بوتل یا چیف جسٹس دا کوئی ذکر نئیں ہووے گا تے ہور وی موضوع نیں مثلاً ایہہ کہ تسیں شلوار نوں شلوار کہن اتے کیوں اڑ جاندے او؟
817
