قومی اسمبلی اجلاس وچ پروڈکشن آرڈر ملن مگروں پیپلزپارٹی آگو تے سابق صدر آصف زرداری نوں نیب حراست توں ایوان وچ لیاگیا،پشتون تحفظ موومنٹ دے آگو تے رکن محسن داوڑ،علی وزیر دی قسمت اوہناں جئی نئیں سی، ایس لئی اوہ نہ اپڑسکے،کئی ممبراں ایس نوں سپیکر ولوں وکھراورتا قراردتا،اسمبلی عملے مطابق دوہاں ممبراں دے پروڈکشن آرڈر دی درخواست اوہناں توں اڈ کوئی ہورنئیں دے سکدا۔
بی بی سی نال گل کردیاں پیپلزپارٹی چیئرمین بلاول بھٹو زرداری آکھیا کہ علی وزیر اور محسن داوڑ دے معاملے وچ ساڈی منگ اوہواے، جدوں ایہہ مسئلہ ہویا سی، میں بطور چیئرپرسن ہیومن رائٹس کمیٹی سپیکر نوں لکھیا سی کہ پروڈکشن آرڈرز جاری کیتے جاون۔‘
اسیں جدوں صدر زرداری دے پروڈکشن آرڈرز حوالے نال اپوزیشن تے حکومتی نمائندیاں توں دستخط لیتے سن،تاں اسیں اک وار فیر الگ توں خط لکھ کے محسن داوڑ تےعلی وزیر دےپروڈکشن آرڈر دی منگ کیتی سی۔
بلاول بھٹودا آکہنا اے جے ایوان مکمل نئیں ہووے گا ہرممبرنوں اپنے حلقے دے لوکاں دی نمائندگی داموقع نئیں ملے گا،تاں ایہہ اک قسم دی دھاندلی ہووے گی۔
قومی اسمبلی دے میڈیا ڈائریکٹر محبوب گورمانی دسیا کہ علی وزیرمحسن داوڑ ولوں پروڈکشن آرڈر جاری کرن لئی کوئی درخواست ای نئیں دتی گئی۔ ایہہ دونوں آزاد ممبر نیں، اینہاں دی کوئی جماعت نئیں اے، اوہناں ولوں کوئی نئیں دے سکتا۔
803
