ادھورہ سفنہ

لکھاری
محمد اویس کھٹانہ
پڑھ کے مشھور وکیل بننا اوہدا زندگی دا وڈا سفنہ سی- کھیڈاں وچوں اوہنوں والی بال، فٹ بال تے باسکٹ بال پسند سی گھوڑسواری اوہ حالی سکھدا پیا سی – اوھدے پیو نے اک تصویر جیھدے وچ اوہ اچا لمبا جوان منہ تے ھلکی ھلکی مچھ تے اپنے گھوڑے تے چڑھیا ھویا کسے پنجابی لوک داستان دا ھیرو لگدا سی اپنے فیس بک پیج تے لائی تے لوکا ں رج کے داد دیتی۔ پر زندگی اینے سوھنے گبھرو نوں اینی تھوڑٰی مہلت دیوے گی، ایہہ کسے دے خواب و خیال اچ وی نہیں سی- اوہ گھروچ سب توں چھوٹا تے ماں پیو دا راج دلارا تے بھیناں بھائیاں دی اکھ دا تارا سی- چڑھدی جوانی نوں ویکھ اوہدے ماں تے پیو اوہنوں لمبی زندگی تے خوشیاں دیا ں دعاواں دیندے سن۔ اے کہانی اے اسامہ قمر کائرہ دی جیہڑا کجھ دن پہلاں اک المناک حادثے وچ اپنے ماں پیو تے رشتے داراں دے نال نال لکھا ں درد دل رکھن والے لوکاں نوں روندیاں چھڈ کے دوجے جہان ٹر گیا-مرحوم اسامہ پیپلز پارٹی وسطی پنجاب دے صدر قمر زمان کائرہ صاحب دا نکا پتر سی۔

قمرزمان کائرہ ھوراں نوں اللہ دی ذات نے اک بیٹی تے دو بیٹے عطا کیتے سن۔اوہناں دے گھر 28 اگست 1997 نوں ساریاں توں نکے پتردا رب دی طرفوں انعام ہویا جس دا ناں اسامہ قمر کائرہ رکھیا۔
اسامہ قمرنوں نکا پتر ہون دی وجہ توں اپنے پیو نال بڑا پیار سی۔ اوس دی زندگی وچ اپنے پیو دی ہورای اھمیت سی جیہڑی اوس نوں باقی بالاں توں وڈا کردیندی اے۔ اسامہ نے اپنے پیو نوں کدھرے کہندا ہویا سنیا سی کہ حیاتی وچ جے کسی گل دا دکھ اے تے اوہ ایہہ اے بئی وکیل نہ بن سکیا۔

اسامہ نے ٹھان لئی بئی اوہ اپنے پیو دے ایس سفنے نوں وکیل بن کے پورا کریگا- کسی وی بندے لئی اولاد جینے دا سہارا ہوندی اے، پر اولاد جے اسامہ قمر ورگی ہوئے تے او اپنی حیاتی ماں پیو دے ادھورے سفنیاں نوں پورا کرن دا سہارا بن جاندی اے۔
کہندے نے کہ وڈے پیو دا پتر وی وڈا ہوندا اے اسامہ دا اپنے پیو دے ادھورے سفنے نوں پورا کرنے لئی چنگا تے ودھیا وکیل بننے دا فیصلہ ایہہ گل وی ظاھر کردا اے کہ اسامہ وی اپنے پیو وانگ وڈی سوچ دا مالک سی۔ اسامہ قمر نے شروع دی پڑھائی لنک سکول سسٹم لالہ موسیٰ توں حاصل کیتی۔ ایس دوران چنگا دل لا کے پڑھائی کیتی تے میٹرک دا امتحان چنگیاں نمبراں نال پاس کیتا۔ میٹرک توں بعد اوس دے پیو دی اوہ گل اسامہ دے کناں وچ ہور زورنال گونج رہی سی جس نوں پورا کرنے لئی اسامہ کائرہ نے پچھلے سال پاکستان دے سب توں ودھیا کالج گورنمنٹ کالج یونیورسٹی لاہوروچ داخلہ لیا ۔

اسامہ دا مہاندرا پورا اپنے پیو ورگا سی تے ایہہ روپ تے اوس دی چڑھدی جوانی دا خمار اس ویلے ہور ودھ جاندا سی جدوں اوہ گھوڑے دی رکاب تے پیر رکھ کے اوس تے چڑھ جاندا سی اوہ ہر پاسیوں اپنے پیو دی جوانی دی تصویر لگدا سی۔ گورنمنٹ کالج یونیورسٹی وچ اسامہ نے ایف-اے وچ داخلہ لیا جیہڑا اوس دے سفنے نوں پورا کرنے لئی اک ہور قدم سی۔ اسامہ نوں اپنی منزل نیڑے آؤندی لگ رہئی سی تے اوس دے پیو نوں اپنے پتر تے مان ہورودھ گیا سی۔ ودھیا تے مشھور وکیل بننے دا اظہاراسامہ گھر وچ کئی واری کرچکیا سی۔ پر اوس دا پیو جان دا سی کہ اوس دے پچھے کیہ گل اے ۔ قمرزمان کائرہ نوں اپنے پتر دی شکل وچ اپنا ادھورہ سفنا حقیقت وچ بدل دا صاف نظر آ رہیا سی۔
پر اللہ دے کم اللہ ہی جانے۔ 17 مئی نوں پچھلے پہر اچن چیت لالہ موسیٰ وچ ٹریفک حادثہ ہویا جس وچ اسامہ قمرتے اوس دا یار حمزہ بٹ دنیا ایہہ دنیا ای نہیں چھڈ گئے سگوں اک ودھیا تے سوھنے پتردے پیودا سفنہ اک واری فیر ادھورہ رہ گیا۔ اسامہ دی اچانک تے جوان موت نے نڈر تے بہادر پیو نوں اندروں ہلا کے رکھ دتا اور اوہ پیو جیہڑا سول تے فوجی آمراں دی حکومتاں دے ساہمنے کھلو کے کدی ناں گھبرایا اوہ جوان پتر دی میت ساہمنے اپنے جذبات تے قابو نہ رکھ سکیا قمر زمان کائرہ دا شمار پاکستان دے وڈے تے پرانے سیاستداناں وچ ہوندا اے۔ کسی وی گل تے عقل وشعور دا استعمال اللہ تعالیٰ دی طرفوں خاص تحفہ ہوندا اے جیہڑا قمر زمان کائرہ نوں قدرت ولوں خاص عطا اے۔ سارے ملک وچ لوک اوہناں نوں نیک، ایماندارتے سیانے سیاستدان دے طور تے جان دے نیں ۔ اللہ دی ذات کسی نوں امتحان وچ نا پائے پرموت اک حقیقت اے، پر ویلے توں پہلاں تے جوان موت دا دکھ وڈا ہووندا اے.
کائرہ دا سیاست نال تعلق کوئی اج دانہیں اوہناں دے والد حاجی زمان کائرہ توں ایہہ سفر شروع ہویا تے چاچا حاجی اصغر کائرہ دو واری قومی اسمبلی دے ممبر بنے سن۔ قمرزمان کائرہ دے چاچے دا پتر چوہدری ندیم اصغرکائرہ مشرف دور وچ لگاتار دو واری پیپلزپارٹی ولوں تحصیل کھاریاں دے ناظم بنے۔ قمرزمان کائرہ دا خاندان کوئی وڈھا جاگیرداریا سرمایا دارنہیں بلکہ عام زمیندار گھرانہ اے۔ ایس لئی قمرزمان کائرہ نے ہمیشہ عام لوکاں دی گل کیتی تے اپنے دھڑے دا اصولاں تے رہندیاں ہویاں ساتھ دتا جیہدی مثال مشرف دور وچ حکومت دی ڈاہڈی مخالفت نوں اک پاسے کردیاں ہویاں اوہناں نے گجرات وچوں پیپلزپارٹی دا جھنڈا قومی اسمبلی وچ اچا کیتی رکھیا۔

اس ٹریفک حادثے اچ حمزہ بٹ وی اللہ دے حوالے ہوئیا جو اسامہ کائرہ دے بچپن دے یار تے حادثے ویلے اک گاڑی دے سوار سن۔ حمزہ بٹ وی چار بھائی تے اک بہن وچوں سب توں نکا سی۔ حمزہ بٹ نے 27 جولائی 1997 نوں لالہ موسیٰ وچ کریم پورہ دے رہائشی سعید امجد بٹ دے گھر اکھ کھولی۔ حمزہ بٹ نے شروع دی تعلیم کنزہ پلے سکول توں حاصل کیتی تے میٹرک دے امتحان وچ چنگے نمبر لئے۔ حمزہ بٹ تے اسامہ قمر دی گوڑھی یاری دا اندازہ ایس توں لایا جاسکدا اے کہ دوہاں دے خیال وی اک دوجے نال رلدے سی اور دونویں قانون دی تعلیم دا شوق رکھدے سن۔ ایسے لئی حمزو بٹ امریکہ وی گئے جس دا مقصد قانون دے شعبے وچ چنگی ڈگری لینا تے مشھور وکیل بننا سی۔ پر کجھ قانونی معاملات دی وجہ نال وطن واپس آنا پے گیا۔ اپنے شوق تے سوچ نوں ساہمنے رکھدیاں لالہ موسیٰ دے اک ہور منڈے نے وی سفنہ ویکھیا تے کھاریاں ڈگری کالج وچ داخلہ لیتا جتھوں گریجویشن کر رہیا سی۔ حمزہ بٹ دے والد نے ساری حیاتی سعودی عرب روزی روٹی واسطے گزاری پر تھوڑا ای عرصہ پہلاں ریٹائرمنٹ لے کے وطن واپس آگے کہ اپنے گھر والیاں نال رہ سکن پر اللہ دی ذات نوں کجھ ہور ای منظور سی۔
عجیب گل اے کہ دونوں اپنے ماں پیو دے نکے تے لاڈلے پتر سن- دوھاں نوں قانون دی تعلیم دا شوق سی تے دونوں آخری ویلے نہ صرف دنیا وچ کٹھے سن سگوں آخرت دا سفر وی اکٹھے شروع کیتا۔ مشتاق احمد یوسفی اک تھاں لکھدے نیں جیویں شربت دے جگ دا تھلواں پانی مٹھا تے سوادلا ہوندااے اوسے طرحاں ساریاں توں نکی اولاد وی اپنے ماپیاں لئی مٹھی تے جیون دا انوکھا جیہا سہارا ہوندی اے۔

کائرہ دے بارے وچ اک ھور وڈیائی سانجھی کراں کہ ایس دلیر پیو نے نماز جنازہ دے بعد اپنے پتر دی بجائے اودھے یار دے جنازے نوں موڈھا دتا- کائرہ ایس آزمائش دی گھڑی وچ رب دی رضا تے راضی رہئے جس پاروں لوکاں دی نظر وچ اوہناں کی قدر ہور ودھ گئی

پر فیر وی کسے آکھیا ایہہ
پتر دفنانے بڑے اوکھے نے
ھتھیں قبر وچ پانے بڑے اوکھے نے
رب کسے نوں اولاد دا دکھ نہ دیوے
اینھاں دیاں قبراں تے پھل پانے بڑے اوکھے نے