اسلام آباد( سجن رپورٹ) نارووال دے پنڈ پٹھان والا وچ گورو نانک دا گردواہ ڈھائے جاون دی خبر اتے سکھ دھرم دی تاریخ دے ماہر تے پنجابی سوجھوان اقبال قیصر نے آکھیا اے بئی ایہہ بڑی ماڑی خبر اے تے عین اوس ویلے ایہو جئی خبر پھیلائی جا رہئی اے جدوں دنیا بھر وچ سکھ گرو نانک دیو جی دا 550 واں جنم دیہاڑ مناون دی تیاریاں کر رہئے نیں۔ اوہناں آکھیا کہ بئی بھانویں پٹھان والا پنڈ دے گردوارے دی کوئی تاریخی اہمیت نہیں سی پر فیر وی ایس مذہبی تھاں نوں نقصان نہیں سی اپڑنا چاہیدا سی۔ اوہناں آکھیا بئی ایس پنڈ وچ گورو نانک دیو جی دا جانا یا کدی بیٹھک کرنا ثابت نہیں اے۔ ایس لئی ایہہ گردوارہ سکھ مذہب دی عبادت دی تھاں تے ہے اے پر ایس گردوارے دا گرو نانک دیو جی دی حیاتی نال کوئی تعلق نہیں ہے۔
انگریزی اخبار ڈان نے خبر دتی سی بئی نارووال دے پنڈ پٹھان والا وچ گورو نانک دیو جی دا گردوارہ ڈھا دتا گیا اے۔ ایس خبر پاروں دنیا بھر وچ سکھ برادری بے چین ہو گئی سی۔ اقبال قیصر دا آکھنا اے بئی اوہناں نے سکھاں دی مقدس تھانواں تے اک کتاب آپ وی لکھی اے تے ایس سلسلے وچ تاریخ وی پڑھی اے۔ اوہناں آکھیا بئی کسی تاریخی کتاب وچ پٹھان والا پنڈ وچ گورو نانک دیو جی دا جانا ثابت نہیں ہوندا۔
484
