بولی وڈ فلم ساز، شاعر تےلکھاری جاوید اختر نے ہندو انتہاپسند شیو سینا ولوں برقعے اتے پابندی دی منگ مگروں آکھیا سی جے بھارت وچ برقع اتے ہٹک لگ رہی اے تاں گھنڈکڈن اتے وی ہٹک لادینی چاہیدی اے۔
شیو سینا پہلی مئی نوں اپنے مراٹھی اخبار ’سامنا‘ دےایڈیٹوریل وچ سرکار تے خاص کر وزیر اعظم نریندر مودی توں منگ کیتی کہ اوہناں نوں شری رام دی دھرتی اتے برقع تےحجاب دی پابندی لا دینی چاہیدی اے۔
شیو سینا دی منگ مگروں بھارت وچ برقعے اتے پابندی دی نویں بحث چھڑگئی سی ،کجھ انتہا پسند ہندو سیاستداناں وی ایہدی حمایت کیتی سی۔
زیادہ جماعتاں تے سیاستداناں ایس پابندی دی منگ دی مخالفت کیتی۔ ایس نوں خطرناک قراردتا، پئی جےایسراں کیتا گیا تے کدے کپڑے پاون اتے پابندی دی منگ وی آسکدی اے۔
لوک سبھا دے ممبر اسد الدین اویسی نے برقع اتے پابندی دی منگ نوں مڈھلے انسانی حقاں دی خلاف ورزی قراردتا۔
اوس توں مگروں جاوید اختر وی 3 مئی نوں پابندی دی مخالفت کیتی تے ایہہ منگ کردتی پئی، راجستھان تے دوجے علاقیاں وچ ہندو زنانیاں دے گھنڈ کڈن اتے وی پابندی لادینی چاہیدی اے۔
راجستھان دے راجپوتاں دی انتہاپسند تنظیم کرنی سینا جاوید اختر دے بیان اتے غصہ وکھایا تے اوہناں توں تن دناں وچ معافی منگن دی منگ کردتی اے۔
597
