روٹی بندہ کھا جاندی اے

لکھاری
شاہد شاہ
یکم مئی اتے پاکستان جیہے ملکاں وچ مزدور دیہاڑ منانا کسے مذاق تو گھٹ نہیں۔ شکاگو وچ 19 ویں صدی وچ مزدوراں دی اپنے حق لئی دتی قربانیاں دی یاد منانا پاکستان جیہے تیجی دنیا دے ملکاں نوں چنگا نہیں لگدا۔ تیجی دنیا دے ملک لیبر ڈے ودھ چڑھ کے مناندے نیں جد کہ ایتھے مزدور وچارے اکا کوئی حق نہیں دیندے۔ ترقی دا منہ ویکھن والے ملک اے دیہاڑ مناون تے گل سمجھ آوندی اے، جتھے مزدور سنے ہر طبقے نوں پورے پورے حق تے جیون دی ساریاں سہولتاں ملدیاں نیں۔ ترقی پاون والیاں ملکاں سوشل سکیورٹی دا سسٹم بنا کے ایہہ سارے رولے ای مکا دتے نیں۔ پاکستان وچ میڈیا اتے بدو بدی ایہہ دیہاڑ مناون تے زور لایا جاندا اے جدکہ ساڈے کول ایس دن اتے دسن لئی کوئی گل نہیں۔

یکم مئی دی چھٹی والے دن سجن لہور اک سروے کیتا، جیہدے وچ ویکھیا گیا بئی مزدور ایس دن وی روزی روٹی لئی کھجل خراب ہو رہے سن۔ اوہناں نوں پچھیا گیا بئی اج تے محنت کشاں دی چھٹی اے تے اوہناں گواچی اکھاں نال ویکھدیاں آکھیا ایہہ مزدوراں دی نہیں امیراں دی چھٹی اے، ساڈے تے ایہہ چھٹی گل پے گئی اے، اگے پچھے فیر وی مزدوری لبھ جاندی سی، پر اج لوک گھراں وچ آرام کر رہے نیں تے اسیں بال بچیاں لئی روزی روٹی لبھدے پھر رہے آں۔ بوہتے مزدور تے اینے غصے وچ سن کے اوہناں گل کرن توں وی انکار کر دتا۔ اک جوان اپنی نفرت حکمران طبقے اتے روڑھ دیاں آکھیا کہ ساڈے کیہڑے حق نیں، ورھے دے ورھے ساڈا جی ساڑن لئی مزدور دیہاڈ دا رولا پا دتا جاندا اے۔ جے کر ساڈی کسے نوں پروا ہوئے تے جیون لئی تھوڑی جنی تھاں سانوں وی دے دین۔ ایہہ جوان گال مندا کردیاں بولدا رہیا، کہندا سی سرکار نے مہنگائی کر کے اک ای ساڈا لک بھن دتا اے۔ ایتھے چنگے بھلے بندے روندے پھر رہے نیں سوچو ساڈا کیہ حال ہووے گا جنہاں نوں کدے چھوٹی موٹی مزدوری لبھ گئی تے کدے اوہ وی نئیں۔ منڈے دی گل تے سچی سی دوجے پاسے ایہناں مزدوراں دے ناں اتے تھاں تھاں جلسے جلوساں تے ریلیاں دیاں دکانداریاں لگیاں سن جنہاں وچ اک وی مزدور نہیں سی۔ ضمیر وچ جھاتی پا کے ویکھیا تے بے شمار ضرورتاں دا ڈھیر نظر آیا تے جدوں مزدور دی ضرورت ویکھی تے نری روٹی سی۔ پر ایہہ روٹی اوہنوں اپنے پچھے ایناں نساندی اے کہ کئی وار اوہ ہف کے بے دم ہو جاندا اے۔