پاکستان اُتے دہشت گردی دا نواں حملہ

طارق عزیز بٹ:

پاکستان چ پولیو مکاؤ قومی مہم 1994ء توں شروع کیتی گئی، اوس ویلے دی وزیر اعظم بےنظیر بھٹو ہوراں ایس مہم دا افتتاح کر دیاں آپنی نِکی دھی آصفہ نوں آپنے ہتھیں پولیو دے قطرے پیوا کے ثابت کیتا کہ پولیو دے قطرے بالاں لئی کِنے ضروری نیں تے ایہناں دا اُکا کوئی نقصان نئیں، ملک اندر ایس مہم دے ہُن تائیں 81 راؤنڈ ہو چکے ہین۔ عالمی ادارہ صحت موجب پاکستان پولیو توں ڈاڈھے متاثر ہوون آلے مُلکاں چ شامل اے جیہدے بارے عالمی اداریاں نوں چوکھی چنتائے۔ ایس موذی بیماری نوں پورے جگ توں مُکا دِتا گیائے پَر ایہدا وائرس پاکستان، نائجیریا تے افغانستان چ حالے تائیں موجود اے۔
ایس ورھے ملکی پَدھر دی دوجی تِن روزہ پولیو مکاؤ مہم 22 اپریل نوں شروع ہوئی جیہڑی 25 اپریل تائیں چالو رہنی سی۔ مہم چ 2 لَکھ 60 ہزار پولیو ورکرز حصہ لَے رہے سن اَتے 3 کروڑ 80 لَکھ بالاں نوں پولیو دے قطرے پیوائے جانے سن۔ دکھ آلی گل اے کہ حفاظتی خطرے، پولیو ٹیماں اُتے وَدھدے حملیاں، لوکاں دی مخالفت اَتے ماپیاں ولوں بالاں نوں قطرے پیاون توں انکار کارن مرکزی سرکار نے اَن متھے ویلے تائیں ایہہ مہم روک دِتی اے۔ مسئلہ صوبہ پختونخوا توں شروع ہویا، دارالحکومت پشاور چ پولیو ویکسین خراب ہوون دی افواہ پھیلن پاروں ہزاراں ماپے قطرے پین والے آپنیاں بالاں نوں لَے کے ہسپتالاں وَل نَس پئے جیہدے مگروں لوکاں مہم چ ہٹکاں پاؤنیاں شروع کر دِتاں تے صوبے دے چوکھے علاقیاں اندر پولیو ٹیماں لئی مہم چالو رکھنا اوکھا ہوگیا۔ بعدوں ایہہ مسئلہ اسلام آباد، کوئٹہ تے کراچی سَنے ملک دے دوجے علاقیاں تائیں وَدھ گیا جتھے ماپیاں وڈی گنتی چ آپنے بالاں نوں پولیو دے قطرے پیاون توں انکار کر دِتا۔
ایہہ پہلی وار نئیں کہ ایس طرحاں دی کسے مہم دوران ہٹکاں پائیاں گئیاں نیں، اَج توں 40 ورھے پچھے اَساڈے نِکے ہوندیاں وی جدوں بالاں نوں موذی بیماریاں توں راکھی لئی حفاظتی ٹیکے لائے جاندے سن تے اِک خاص مذہبی ذہنیت دے لوک اودوں وی پروپیگنڈا کر دے سن کہ ایہہ ٹیکے بالاں نوں نامرد بناون دی سازش اے تاں جے مسلماناں دی آبادی گھٹ کیتی جا سکے۔ ماضی وانگوں اَج وی مذہب دا ناں وَرتیا جا رہیائے، لوکاں دی جہالت توں وی فیدہ چُکیا جاندائے جد کہ پولیو ٹیماں نوں کم کرن توں ڈَکن لئی اوہناں اُتے حملے وی کیتے جاندے ہین۔
سرکاری عہدیداراں موجب پاکستان دے 12 وَڈے شہراں دے گٹر دے پانی چ پولیو وائرس ہوون دا پَک اہے، جنہاں چ لہور، راولپنڈی، پشاور، مردان، بنوں، وزیرستان، کوئٹہ، قلعہ عبداللہ، کراچی، حیدر آباد، قمبر اَتے سکھر شامل ہین۔ پچھلے 6 مہینے دوران ملک اندر پولیو دے 18 نویں کیس ساہمنے آئے نیں جنہاں وچوں 10 دا تعلق صوبہ سندھ نال اے ایہناں وچوں 3 کیس کراچی دے ہین۔ پولیو وائرس 5 ورھے عمر تائیں دے بالاں اُتے حملہ کردائے تے متاثر ہون آلے چنگے بھلے تگڑے بال نوں ساری حیاتی لئی اپاہج کر دیندائے۔ ایس بیماری دا کوئی علاج نئیں، ایہدے توں بچاؤ صرف بالاں نوں کُجھ چِر مگروں بار بار پولیو دے قطرے پیاون نال ای ہو سکدائے۔ سوچی سمجھی سازش تحت پولیو مہم ناکام بنائی جا رہی اے تاں جے اَساڈی آؤن آلی نسل نوں اپاہج کیتا جا سکے جیہڑا کہ دہشت گردی نالوں گھٹ جرم نئیں۔ مہم ڈَکن نال ایہہ موذی بیماری ہور وَدھ سکدی اے، سرکار نوں ایس پاسے بھرواں دھیان کرنے دی لوڑ اے۔