لہور دے کئی علاقیاں وچ جگر دا روگ ہپٹائٹس اے تے ای ودھ رہیا اے، ایس دا وڈا کارن گندے پانی دی سپلائی اے۔
دی نیوز دے رپورٹ وچ دسیا پئی، سنت نگر، کریم پارک، اچھرہ، گلبرگ، شادباغ تے ٹاؤن شپ وچ ہپٹائٹس دے روگی وڈی گنتی وچ ہسپتال لیاندے گئے نیں۔
عالمی صحت دے ادارے مطابق لہور وچ اے تے ای وائرس دے بوہتے روگی ہسپتالاں وچ لیائے گئے نیں۔ سول سیکرٹریٹ دے پچھے علاقے سنت نگر بارے دسیا گیا کہ اوتھے ہرگھروچ اک ہپٹائٹس اے یاای دا روگی پایا جاندااے۔
پانی تے نکاس دے ادارے واسا دی کارگزاری اتے رہائشی ڈاھڈاغصہ وکھاندے آکھیاپئی،نکاس دے پائپ پاٹن پاروں پین والا پانی گندا ہوجانداے۔ باربار دسن مگروں کجھ نئیں کیتا جارہیا۔
شہر دے کئی علاقیاں وچ گندے پانی نے ایس روگ نوں ودھان وچ مددکیتی اے۔ حاملہ زنانیاں تے اوہناں دے بالاں وچ وی وائرس پایا جارہیا اے۔ہپٹائٹس ای گروتی زنانی نوں متاثر کردا اے۔ نویں سرکار وی ایس خطرے نال نبڑن لئی کجھ نئیں کیتا۔ وزیرصحت جدالیکشن لڑرہی سن،اوہناں لیگی سرکار اتے گندے پانی بارے تنقید کیتی۔ ہن وزیربنن مگروں اوہ سبھ کجھ بھل گئیاں نیں۔اچھرے دے وسنیک کئی وار ایس معاملے اتے واسا خلاف وکھالےکرچکے نیں۔
گیسٹرولوجسٹ ڈاکٹر غیاث الدین نبی طیب دا آکھنا اے کہ برسات مگروں ہپٹائٹس اے تے ای دے ودھن داامکان ہوندا اے۔ اوہناں صفائی دا خیال رکھن، کھانے توں پہلاں ہتھ صاف کرن، پین دے پانی نوں ابال کے ورتیاجاوے۔کچی سبزیاں وی نہ کھائیاں جاون۔ ڈاکٹراں ایس بارے لوکاں نوں مشورہ دتا اے پئی، اپے جنی وی احتیاط کرسکدے نیں ،کرلی جاوے تاں ای ایس خطرے نال نبڑیاجاسکدااے۔
709
