لنگڑی سوچ تے پولیو ورکرز

لکھاری
عبدالکریم قادری
کراچی دے مشہور علاقے گلستان جوہر وچ بندیاں نے پولیو ورکرز دے ہتھیں پے کے ثابت کردتا بھئی لنگڑے بندے دا علاج ممکن اے پر لنگڑی سوچ دا کجھ نہیں کیتا جا سکدا۔ میں رات ساری ایہو سوچدا رہیا بھئی خلق دی خدمت کرن لئی گھر گھر بوہے کھڑکا کے جان والے پولیو ورکرز دا کیہہ قصور اے۔۔
۔میرے ساہمنے نوے دے دہاکے دا اک اشتہار چلیا۔اشتہار وچ حکومت اعلان کردی بھئی جیہڑا بندا سادہ نمک کھاندا اے اوہ گلھڑ سمیت گلے دیاں بیماریاں وچ مبتلاہوندا اے۔ایس پاروں لوکیں سادہ نمک ورتن توں بچن تے آیوڈائیزڈ لون مل لین۔
اشتہار تھوڑے دن چل کے بند ہوگیا پر ہر پاسے کرلام مچ گیا۔ اوہ دن تے اج دا دن۔۔ہر بندہ لون خریدن توں پہلاں تسلی کردا اے کہ ایہہ آئیوڈایزڈ ہے کہ نہیں۔ سادہ لون دی وکری بند ہوگئی۔ نمک اک عام جی بے قدری شے اے۔ایس دے خلاف ایہہ مہم کیوں کامیاب ہوئی۔ایہدی وجہ دلچسپ اے۔سادہ نمک دی قیمت بہوں گھٹ سی۔اوس ویلے آٹھ آنے دا کلو نمک ملدا سی۔ آئیوڈائزڈ نمک دی قیمت دس توں بارہ روپے کلو سی۔ ایہو اوہدی کامیابی داراز سی۔ لوکاں دی ذہنیت ایہو جئی اے کہ اوہ مفت ملن والی نعمت نوں ٹھکراندے نیں۔ ملٹی نیشنل کمپنی دا پنج سو دا برگر عام انڈہ شامی والے برگر توں ذائقے وچ ودھ نہیں ہوندا صرف بندے دے اندر شاہ خرچی دا خناس اوہدا مل ودھان تے مجبور کردا اے۔ ایسے ذہنیت نوں ملٹی نیشنل کمپنیاں نے نمک ورگی عام چیز نوں مہنگیاں کر کے ویچن بارے ورتیا تے اج نتیجہ سب دے ساہمنے اے۔پولیو قطرے مفت ملدے نیں تے کسے نوں پرواہ ای نہیں کہ عملے دی تنخواہواں اتےارباں روپیہ خرچ ہوندا اے۔اج حکومت اعلان کردیوے کہ میڈیکل اسٹوراں تے پنج پنج سو روپے وچ قطرے بچیاں نوں پوواو تے اوتھے رش ویکھن آلا ہووے گا۔ایہناں قطریاں دا مل اوہناں کولوں پچھو جیہڑے لوک اس موذی مرض دا شکار ہو کے لولے لنگڑے ہو گئے۔میری ہتھ جوڑ کے گزارش اے کہ آپنیاں بچیاں تے رحم کرو۔حکومت کوئی چیز مفت دے رہئی اے تے اوس دی قدر کرو۔جے اج حکومت نے سر توں ہتھ چک لیا تے ڈاکٹر دے نسخے تے ایس بے قدرے قطرے دی قیمت لکھ روپے لکھی ہوئی ہووے گی تے تہانوں لینے ای پوون گے۔ تے فیر ہر بندہ حکومت نوں منت کرے گا کہ ساڈے حال تے رحم کرو۔