پاکستان وچ سبھ ہندو

ہندوستان دی ریاست بہار دے ضلع پورنیہ دی سب ڈویژن سرینگر دا اک نکا پنڈ جنہوں ٹولہ آکھدے نیں، اوس دا ناں “پاکستان” اے۔ بارہ سو بندیاں دے ایس پنڈ وچ 350 ووٹر نیں
بی بی سی دی رپورٹ وچ دسیا ایس پنڈ وچ پہلاں مسلمان وسدے سن جنہاں نوں لوکیں پاکستانی آکھدے اوہ ایتھوں ٹرگئے اوہناں دی تھاں ہندو آوسے۔

ایس پنڈ دا ناں پاکستان ای رہیا، کسے ایس نوں بدلن دی کوشش نئیں کیتی۔ انڈیا دی ایس پاکستان وچ سرکار وکھائی نئیں دیندی۔ ایتھے سڑک، ہسپتال تے سکول کجھ نئیں اے۔
ایتھوں دے رہن والیاں دا آکھنا اے ایس پاکستان وچ جمے آں ایہدے وچ اوہناں دا کیہ قصور اے، پئی کوئی سہولت نئیں ملدی۔ ہسپتال تے سڑک نئیں، جیہدے کارن بوہتے بیمار ہون تے شہر لے جاندے راہ وچ موت ہوجاندی اے۔

پاکستان وچ ٹی وی اخبار نئیں، شاید ایس کارن لوکاں دا آپسی میل چنگا اے۔ اوہناں نوں ایہہ جانکاری اے پئی انڈیا دا پاکستان نال تعلق چنگا نئیں اے۔
اوہ دسدے نیں ایتھے نیتا آوندے نیں وعدے کردے نیں مڑ کوئی نئیں آندا۔ ڈر مارے کوئی کم نئیں کراندا۔
چوناں دے دوجے پڑا وچ ایتھے ووٹاں پین گئیاں۔ ایس وار وی نیتا آئے تے پاکستان دے وسنیکاں نوں کوئی آس لاگئے نیں۔ پنڈ والیاں دا آکھنا اے ایہدا ناں اوہناں دا دشمن اے، جیویں پاکستان دا ہندوستان اے۔