سوڈان وچ فوجی بغاوت 30 ورھیاں مگروں صدر عمرالبشیر دا راج مک گیا، ایس وچ لوکاں دے احتجاج دا وڈا ہتھ سی، دسمبر توں ہوون والے وکھالیاں وچ اکو سار خرطوم یونیورسٹی دی انجنیئرنگ آرکیٹکٹچر دی 22 ورھی پڈھیار الا صالح وی وڈا حصہ پایا، اوس دی تقریراں کردیاں تے سرکار خلاف نعرے لاندیاں دی مورت ویکھدے ویکھدے ای پورے ملک وچ وائرل ہوگئی۔ اوس نوں لوکاں بوہت سلاہنا دتی، دس اپریل والے دیہاڑ اوس خرطوم وچ صدر عسمر البشیر خلاف آرمی دے ہیڈکوارٹر اگے اک اکٹھ نال خطاب کیتا۔ جیہدے وچ اوس بڑے بھرنویں طریقے نال لوکاں نوں ایہہ سنیہا دتا پئی ہن اوہ گھراں توں نکل آون خاص کر زنانیاں وی تے سرکار دا جانا متھیا جاچکیا اے۔ اوس انقلابی شاعری سنا کے لوکاں دی توجہ حاصل کیتی۔
باہر دے اخباراں ایس دے جوش تے ہمت دی سلاہنا کیتی اے اوہناں آکھیا ایس بغاوت تے تبدیلی وچ بھانیوں ایس کڑی کوئی بوہت وڈا کردار نئیں سی۔ فیر وی اوس دی تقریر کردیا دی مورت لوکاں نوں وی کٹھیاں کیتا تے فوج اپنی کارروائی وچ سرت وکھائی۔
اک سیانے دی صلا اے پئی ملکاں سی سیاسی تریخاں وچ اجیہے جوان اوہناں دے نعرے تے اوہناں دی ہمت کئی وار سارا نقشہ ای پلٹ دیندیاں نیں۔ ایس کڑی الا صالح نوں وی لوکیں اجیہی نگاہاں نال ویکھن گے۔ اوس نوں سوڈان دے نویں لیڈر دے طور تے وی جانیا جاوے گا۔
الا صالح دسیا پئی اوس دا کسے سیاسی گھرانے نال تعلق نئیں۔ اوہ نرا لوکاں دا حوصلہ ودھان لئی باہر نکلی سی۔
753
