اسلام آباد آباد( سجن رپورٹ) وزیر اعظم عمران خان اج حیدر آباد وچ اک بے نام یونیورسٹی دا نیہہ پتھر رکھ آئے نیں جیہدا اجے ناں رکھایا گیا اے تے نا ای اوس دی کوئی تھاں اے۔
حیدر آباد وچ یونیورسٹی بناون دا اعلان بحریہ ٹاؤن دے ملک ریاض نے کجھ سال پہلوں کیتا سی۔ ملک ریاض آکھیا سی بئی اوہ حیدر آباد وچ ایم کیو ایم کے آگو الطاف حسین دے ناں تے حیدر آباد وچ یونیورسٹی بناون گے۔
تھوڑے چر مگروں ملک ریاض نے کراچی دے علاقے ملیر دی ہزاراں کنال سرکاری تھاں بحریہ ٹاؤن دے ناں لوا لئی تے یونیورسٹی لوکاں نوں بھل گئی۔ سپریم کورٹ نے ملک ریاض نال سودے بازی کر کے اوس نے آکھیا اے بئی بحریہ ٹاؤن ست سالاں وچ پیسے جمع کرائی۔
اج عمران خان وزیر اعظم ہاؤس وچ یونیورسٹی دا نیہہ پتھر اک ہال وچ رکھ آئے نیں تے یونیورسٹی لئی تھاں اجے لبھن دی ذمہ داری ایم کیو ایم آگواں تے جی ڈی اے دی ٹکٹ تے جتے محمد میاں سومرو نوں دے آئے نیں۔
ایس بے ناں تے نے نشان یونیورسٹی دے لئے کیتے اکٹھ وچ تقریر کردیاں وزیر اعظم آکھیا بئی اوہ کجھ لوکاں نال رل کے جہلم ضلع دے علاقے سوہاوہ وچ نویں یونیورسٹی بناون لگے نیں جتھے سائنس تے صوفی ازم پڑھائی جائے گی۔ اوہناں فرمایا بئی صوفی یونیورسٹی وچ نبی ﷺ دی حیاتی اتے پڑچول کیتی جائے گی۔
وزیر اعظم نوں حیدر آباد وچ ایہہ بے ناں تے بے نشان یونیورسٹی دا نیہہ پتھر رکھن دی کیہ لوڑ پے گئی سی ایس دی اجے وجہ دا پتہ نہیں لگا۔
447
