سونا تولہ 72200 روپے دا ہو گیا

لہور (وسیم عظمت) پاکستان وچ سونے دا مُل ریکارڈ 72200 روپے تولہ ہو گیا۔ یکم اپریل توں ہُن تائیں سونے دا فی تولہ مُل 1650روپے ودھ چُکیائے۔ مارچ دوران 24 قیراط سونے دا مُل تریخ وچ پہلی واری ستر ہزار روپے تولہ ہویا سی۔ دلچسپ گل ایہہ وے کہ سونا عام طور تے عالمی منڈی وچ مہنگا ہووے تے پاکستان وچ وی اوہدا مُل ودھدائے پر ہُن ڈالر دے مقابلے تے پاکستانی روپے دی قدر سونے دے مُل اُتے بوہتا اثر پاؤندی اے۔ بازار دی صورتحال تے نظر رکھن والے سنیاریاں دا آکھنائے کہ آؤن والے دِناں چ وی 24 قیراط سونے دا مُل گھٹن دا امکان کوئی نئیں کیونجے اِک تے اَج کل ملک چ ویاہ شادیاں دا موسم اے تے دوجا ڈالر دے مقابلے تے روپے دی قدر ہور ڈِگن دا خطرہ اے، تریجے امریکہ وچ وی سونے دی فیوچر پرائس ودھ رہی اے۔