اسلام آباد( سجن رپورٹ)فیس بک نے پاکستان وچوں چلائے جاون والے 103 اکاؤنٹ بند کر دتے نیں جہناں اتے شک سی بئی اوہ فوج دے محکمہ تعلقات عامہ دے ملازماں ولوں چلائے جا رہئے سن۔
کپمنی نے اکھیا اے بئی 24 صفحے، 57 فیس بک اکاؤنٹ، 7 گروپ اکاؤنٹ تے 15 انسٹاگرام دے اکاؤنٹ بند کیتے گئے نیں۔
فیس بک دی کمپنی دا کہنا اے بئی اور بھارتی سیاسی جماعت کانگریس ولوں چلائے جاون والے ست سو دے نیڑے اکاؤنٹ وی بند کر رہئی اے۔
کمپنی دا کہنا اے بئی پاکستان توں چلائے جاون والے اکاؤنٹس توں اکثر ملک دے سیاست داناں تے مقامی مسلیاں دے بارے پوسٹاں لائیاں جاندیاں سن۔ ایس تو وکھ بھارت دے خلافتے فوج بارے وی پوسٹاں لائیاں جاندیاں سن۔
کمپنی دا کہنا اے ایہہ اکاؤنٹ چلاون والیاں نے اپنے اصل ناں لکائے سن پر کمپنی نے اپنی پڑچول کر کے ایہناں دا پتہ لایا تے اوہ آئی ایس پی آر دے ملازم نکلے۔
فیس بک دا آکھنا اے بئی ایہناں وچوں اک یاں اک توں ودھ اکاؤنٹ ایہو جئے سن جنہاں نوں 28 لکھ لوکاں نے فالو کیتا سی تے 4700 اکاؤنٹس نے ایہناں دے رکنیت لئی سی۔
ایس توں وکھ 1050 بندے یاں اکاؤنٹس ایہناں صفحیاں نوں ٹویٹر تے وی فالو کر رہئے سن۔
بھارت وچوں چلائے جاون والے 687 اکاؤنٹس نوں کمپنی نے بند کرن دا اعلان کیتا اے جنہاں دے بارے آکھیا گیا اے بئی ایہہ سیاسی خبراں تے سیاسی آگواں دے بیان چلا رہئے سن جنہاں نوں مخالف امیدواراں دے خلاف ورتیا جا رہیا سی۔
