سٹاک مارکیٹ وچ مندی دا راج

لہور(سجن رپورٹ) پاکستان دی سٹاک مارکیٹ وچ اج مندی دا راج رہیا. 218 کمپنیاں دے شئیرز دی قیمت گھٹ گئی تے 79 کمپنیاں دے حصص دی قیمت وچ وادھا ہویا. ہنڈرڈ پوائنٹس انڈیکس 435 پوائنٹس دا گھاٹا ہویا جیہڑا 1.13 فیصد سی. اج جیہڑی کمپنیاں دے حصص دی قیمت گھٹ ہوئی اوہناں وچ آئل اینڈ گیس ڈیویلپمنٹ کمپنی وی شامل اے جیہنے 22 مارچ نوں اپنی کارکردگی دی چھ ماہی رپورٹ وچ دسیا سی بئی چھ مہینے وچ کمپنی دا منافع 84 ارب 73 کروڑ روپے سی جدوں کہ پچھلے سال دے ایہناں چھ مہینیاں وچ کمپنی نے 52 کروڑ روپے منافع کمایا, کمپنی دے منافع وچ 32 ارب روپےدے وادھے دے باوجود سٹاک مارکیٹ وچ کمپنی دے حصص دی قیمت ڈگ گئی. کل 27 مارچ نوں سٹاک مارکیٹ وچ تیزی سے تے ہنڈرڈ پوائنٹس انڈیکس 636 پوائنٹس ودھ گیا سی. مالیاتی تے معاشی معاملیاں دے سیانے سٹاک مارکیٹ وچ اتار چڑھا دی کئی وجہاں دس رہے نیں جنہاں وچ معاشی پالیسیاں دے بارے وچ کاروباری لوکاں دی بے یقینی اہم اے